حه‌زدكه‌ت هه‌موو ستایل دناڤ مۆزیكا كوردی دا هه‌بن
دهۆك، زنار تۆڤی:
مۆزیكژه‌ن (بلند مه‌هدی) كو لێده‌رێ ئامیرێ قانوونێ یه، د دیداره‌كێ دا بۆ رۆژناما ئه‌ڤرۆ دیاركر كو ئه‌و ده‌رچوویێ پشكا مۆزیكێ یه، ل په‌یمانگه‌ها هونه‌رێن جوان ل دهۆكێ، نوكه ژی ئه‌و قۆتابییه ل پشكا مۆزیكێ، ل كۆلیژا هونه‌رێن جوان ل زانكۆیا سه‌لاحه‌ددین ل هه‌ولێرێ، و ژبه‌ركو ئه‌و دناڤ مالباتاكا هونه‌ر دۆست دا مه‌زن بوویه، له‌وما وی مۆزیك هه‌لبژارتیه، وی ئامیرێ قانوونێ هه‌لبژارتیه، چونكو ئه‌و ئامیره یێ كێمه و وی ڤییایه ب رێیا ڤی ئامیری خزمه‌تا هونه‌رێ كوردی بكه‌ت، و ب دیتنا وی د نوكه مۆزیكا كوردی هه‌تا راده‌كێ باش پێشڤه چوویه، هه‌ر چه‌نده هنده‌ك مۆزیكێن وه‌لاتێن ده‌وروبه‌ر كارتێكرن ل سه‌ر مۆزیكا مه یا كوردی یا ره‌سه‌ن كریه، ئه‌ڤ چه‌نده ژی ڤه‌دگه‌ریت بۆ هندێ، كو هه‌ر ژ كه‌ڤندا مۆزیكا كوردی و په‌یڤ و ئاواز ژی نه‌هاتینه نڤیسین، هه‌كه هاتبانه نڤیسین، ئه‌و ڤالاهیه د وارێ مۆزیكێ دا نه‌دبوو.
هه‌روه‌سا گۆت: ئه‌ز ل گه‌ل هندێ مه هه‌موو ستایلێن مۆزیكێ دناڤ مۆزیكا كوردی ژی دا هه‌بن و بهێنه تێكه‌لكرن ل گه‌ل مۆزیكا كوردی و ئه‌ڤه دێ كاره‌كێ باش بیت، دیسان من ل به‌ره د وارێ مۆزیكێ دا ئه‌ز پتر خوه پێش بێخم و پتر كار بكه‌م، ژ پێخه‌مه‌ت ببمه مۆزیكژه‌نه‌كێ به‌رنیاس ل سه‌ر ئاستێ كوردستانێ، هه‌روه‌سا من هنده‌ك كلیپه مۆزیك ژی چێكرینه و به‌لاڤ كرینه، نوكه ژی ئه‌ز مژوولی چێكرنا هنده‌ك كارێن نوو یێن مۆزیكێ مه، ئه‌و پارچه مۆزیكه من یێن دروست كرین، ل ڤان نێزیكان من ل به‌ره به‌لاڤ بكه‌م.
