حه‌زژ كه‌ڤالێن كلاسیكی دكه‌ت
ئاكرێ, گوهدرا سلێمان:
شێوه‌كار(ئیلاف نعمان) كو نوكه قوتابیه ل قوناغا سێیێ ل په‌یمانگه‌ها هونه‌رێن جوان ل دهۆكێ، د دیداره‌كێ دا بۆ رۆژناما ئه‌ڤرۆ دبێژیت: ئه‌ز ئێك ژ قوتابیێن زیره‌ك بووم ل قوتابخانێ و ئه‌ز دشیام ببمه نۆژدار یان ئه‌ندازیار، به‌لێ حه‌زا من پتر ل سه‌ر هونه‌ری بوو, له‌ورا ب پشته‌ڤانیا خێزانا من، ب تایبه‌ت خویشكا منا شێوه‌كار(هۆزانێ) كو هه‌رده‌م دگۆته من وی جهی هه‌لبژێره یێ ته حه‌ز ل سه‌ر هه‌بیت, له‌ورا من هزرێن خوه كرن و هنده‌ك پلان بۆ خوه دانان و من په‌یمانگه‌ه هه‌لبژارت.
هێشتا گۆت: هه‌تا نوكه من پشكداری د گه‌له‌ك پێشانگه‌هان دا كریه و من ل به‌ره پێشانگه‌هێن تایبه‌ت ژی ڤه‌كه‌م, به‌لێ من دڤێت هزرێن پێشانگه‌ها من د جودابن ژ پێشانگه‌هێن دی و دوور بن ژ تشته‌كێ چاڤلێكری, له‌وما ئه‌ز پێدڤی ب ده‌می و شاره‌زایه‌كا پتر هه‌تا بشێم ئه‌ڤی كاری بكه‌م، بۆ زانین هه‌تا نوكه من چ ستایلێن تایبه‌ت نه هه‌لبژارتینه, به‌لێ من دڤێت ب شێوه‌كێ ئه‌كادیمی پشتی ژ وان قوناغان ده‌رباز دبم ئه‌ز دی َستایله‌كێ تایبه‌ت ب خوه‌ڤه هه‌لبژێرم, به‌لێ نوكه پترحه‌ز ژ كه‌ڤالێن كلاسیكی دكه‌م و پتریا جاران ده‌مژمێر پێنچی سپێدێ كاردكه‌م، چنكو ل وی ده‌می هه‌موو دبێ ده‌نگن، و ل پاشه‌رۆژێ من ل به‌ره كارێ دیزاینا جلكان بكه‌م.
