حه‌ز دكه‌ت سترانێن دوقۆلی ل گه‌ل شه‌هریڤانا كوردی و نازدار جزیری بێژیت
ئه‌ڤرۆ، زنار تۆڤی:
خانما سترانبێژ ئیلایده مه‌تین، خه‌لكا باژێرێ وانێ یه ل باكوورێ كوردستانێ، ئه‌ڤه بۆ ده‌مێ 10 سالانه ل باژێرێ هه‌ولێرێ دژیت، د دیداره‌كێ دا بۆ رۆژناما ئه‌ڤرۆ دیار كر كو: د وارێ هونه‌ری دا دایك و بابێن وێ گه‌له‌ك پشته‌ڤانی ل وێ كریه، كو ئه‌و ببیته سترانبێژ، بابێ وێ مه‌تین جه‌عفه‌ر، خودان ده‌نگه‌كێ خوه‌شه و ل گه‌ل وێ سترانه‌كا دوقۆلی ژی چێكریه، هه‌روه‌سا ئه‌و د ناڤ مالباته‌كا هونه‌ری دا مه‌زن بوویه و ئه‌ڤه نێزیكی سێ سالانه ئه‌و ب ره‌نگه‌كێ پرۆفیشنال د وارێ هونه‌ری دا كار دكه‌ت و سترانان دبێژیت، هه‌روه‌سا وێ پشكداری د به‌رنامێ “زه لێجنت” دا، ل سه‌ر شاشه‌یا “ئاڤا ئینترتایمێنت”دا كریه.
ناڤهاتیێ گۆت ژی: ئه‌و د ژیێ 19 سالیێ دایه و قۆتابیه ل قووناغا ئێكێ ل په‌یمانگه‌ها هونه‌ری ل هه‌ولێرێ، هه‌تا نوكه وێ سێ كلیپ به‌لاڤ كرینه، هه‌روه‌سا نوكه ئه‌و كار د چێكرنا به‌رهه‌مه‌كێ نوو دا دكه‌ت، ل سالا بوری وێ كلیپا خوه یا ئێكێ چێكریه، دیسان وێ ئاسته‌نگی د وارێ ئابووری دا هه‌نه و هه‌تا نوكه نه‌شیایه وه‌كو پێدڤی كارێن هونه‌ری ئه‌نجام بده‌ت، ئه‌و كارێن وێ ئه‌نجامداین هه‌موو ب پشته‌ڤانییا خێزانا وێ بووینه.
ئیلایده هێشتا دبێژیت: نوكه ئه‌و مژوولی تۆماركرنا سترانه‌كا نوویه ب ناڤێ ” تو جانی”، ل ڤان نێزیكان دێ وێ سترانێ كیلپ كه‌ت و به‌لاڤ كه‌ت، هه‌روه‌سا ب ره‌نگه‌كێ گشتی د وارێ هونه‌ری دا گه‌له‌ك ئاسته‌نگ دكه‌ڤنه پێشیا كچێن هونه‌رمه‌ند ل كوردستانێ، ئه‌ڤ چه‌نده ڤه‌دگه‌ریت بۆ نه‌بوونا پشته‌ڤانیێ بۆ هونه‌رمه‌ندێن كچ ژ ئالیێ مالباتێن وان ڤه، هێشتا جڤاكێ مه ب چاڤه‌كێ كێم به‌رێ خوه دده‌ته هونه‌رمه‌ندێن كچ، هه‌ر چه‌نده دڤێت جڤاكێ مه پشته‌ڤانییێ ل هونه‌رمه‌ندێن كچ بكه‌ن، چونكی ئه‌ڤ كارێ ئه‌م دكه‌ین، خزمه‌ته‌كه ژ بۆ گه‌ل و وه‌لاتێ مه.
ئه‌و خانما هونه‌رمه‌ند هێشتا دبێژیت: ئه‌و حه‌ز دكه‌ت سترانه‌كا دوقۆلی ل گه‌ل هونه‌رمه‌ندا كورد شه‌هریڤانا كوردی و نازدار جزیری بێژیت، هه‌ر چه‌نده هه‌تا نوكه وێ ئه‌ڤ بابه‌ته ل گه‌ل وان هه‌ردویان به‌حس نه‌كریه، هه‌روه‌سا ئه‌و حه‌ز دكه‌ت، كچێن كورد وێره‌كانه بهێنه د ناڤ هونه‌رێ كوردی دا و خزمه‌تا هونه‌رێ كوردی د هه‌موو واران دا بكه‌ن، دیسان د وارێ سترانگۆتنێ دا وێ ستایلێ خوه یێ تایبه‌ت هه‌یه، هه‌روه‌سا ئه‌و حه‌ز دكه‌ت وه‌كو ئه‌كته‌ر ژی پشكداریێ د كارێن سینه‌مایی دا بكه‌ت، لێ ئه‌و پتر حه‌ز ژ سترانگۆتنێ دكه‌ت، ئه‌و حه‌ز دكه‌ت كارێ پێشكێشكاریێ ژی بكه‌ت.
ئیلایده هێشتا دبێژیت: ئه‌و حه‌ز دكه‌ت ب تنێ ب زمانێ كوردی سترانان بێژیت، هه‌روه‌سا د وارێ موزیكێ دا باكوورێ كوردستانێ پێشكه‌فتنه‌كا به‌رچاڤ ب خوه‌ڤه دیتییه، لێ كارتێكرنا مۆزیكا توركی ل سه‌ر یا كوردی ل باكوورێ كوردستانێ هه‌یه، دیسان گه‌له‌ك ژ هونه‌رمه‌ندێن مه چاڤلێكرنا هونه‌رمه‌ندێن بیانی دكه‌ن و مۆزیكا بیانی د ئێخنه د ناڤ سترانێن كوردی دا، هه‌روه‌سا ئه‌ز هه‌موو ده‌مان بزاڤان دكه‌م، كو كارێن باشتر پێشكێشی خه‌لكێ كوردستانێ بكه‌م، دیسان هه‌موو هیڤیێن من ئه‌ون، كو د داهاتی دا ئه‌ز بشێم ئه‌لبۆمه‌كا سترانان ژی چێكه‌م.
