حه‌ز دكه‌ت مۆزیكا راپ و پۆپ دناڤ مۆزیكا كوردی دا هه‌بیت
ئه‌ڤرۆ، زنار تۆڤی:
سترانبێژ ئۆزكان شه‌نه، كو خه‌لكێ باژێرێ مۆشێ یه ل باكۆرێ كوردستانێ، د دیداره‌كێ دا بۆ رۆژناما ئه‌ڤرۆ دیاركر كو ئه‌ڤه بۆ ده‌مێ دوازده سالانه ئه‌و سترانان دبێژیت، مالباتا وی پشته‌ڤانی ل وی كرینه و حه‌ز دكه‌ت سترانێن هه‌ڤچه‌رخ بێژیت، دیسان ئه‌و حه‌ز دكه‌ت مۆزیكا راپ و پۆپ و ئارابێسك دناڤ مۆزیكا كوردی دا هه‌بن، لێ دڤێت ستران ب تام و روحیه‌تا كوردی بهێنه چێكرن، هه‌تا نوكه وی كلیپه‌ك چێكریه و ل نێزیك ل به‌ره دو كلیپێن نوو به‌لاڤ بكه‌ت و دێ هنده‌ك سترانێن سینگل ژی چێكه‌ت.
ناڤهاتی گۆت: ژبه‌ر بارێ دارایی هه‌تا نوكه من چو ئه‌لبۆم چێنه‌كرینه، هه‌روه‌سا ئه‌ز دچمه ئاهه‌نگ و دیلانێن كوردان ل پرانیا باژێرێن كوردان ل باكۆرێ كوردستانێ، به‌لێ ژبه‌رگرتنا ته‌له‌ڤزیۆن و رادیۆنێن كوردی ژ ئالیێ ده‌وله‌تا تورك ڤه، ئه‌م كارێن خوه یێن هونه‌ری ب رێیا سۆشیال میدیایێ به‌لاڤ دكه‌ین، دیسان ژ ئه‌گه‌رێ كۆرۆنایێ ژی ئه‌م نه‌شیاینه وه‌كو پێدڤی كارێ خوه یێ هونه‌ری بكه‌ین، ڤێ چه‌ندێ كارتێكرن ل سه‌ر كارێ وی یێ هونه‌ری كریه، هه‌روه‌سا ئه‌ز حه‌ز دكه‌م سه‌ره‌دانا هه‌رێما كوردستانێ بكه‌ت، چه‌ندین كارێن هونه‌ری ژی ئه‌نجام بده‌ت.
