حه‌ز دكه‌ت پشكداریێ د فلم و درامایێن كوردی دا بكه‌ت
ئه‌ڤرۆ، زنار تۆڤی:
خانما شه‌بنه‌م بارانی، كو كچه‌كا نمایشكار و فۆتۆمۆدیلێنگێ یه، ل باژێرێ مهابادێ ل رۆژهه‌لاتێ كوردستانێ ژ دایك بوویه، ئه‌ڤه ده‌مێ 20 سالانه ل گه‌ل خێزانا خوه ل وه‌لاتێ نه‌رویج دژیت، بۆ رۆژناما ئه‌ڤرۆ دیار كر: د ژیێ چار سالیێ دا چوویه وه‌لاتێ نه‌رویج و نوكه قوتابیه ل قۆناغا دووماهیێ یا كۆلیژا نۆشداریا ده‌روونی ل زانكۆیێ، هه‌روه‌سا وێ بریار دایه ڤێ پشكێ بخوینیت، دا كو هاریكاریا وان كه‌سان بكه‌ت، یێن كو ئێشێن ده‌روونی هه‌ین، ل گه‌ل هندێ ژی كارێ نمایشكاریێ دكه‌ت، هه‌روه‌سا هه‌تا نوكه چه‌ندین جاران وێ سه‌ره‌دانا كوردستانێ كریه.
شه‌بنه‌مێ ئه‌و ژی گۆت: (ده‌مێ وێ ده‌ست ب كارێ مۆدیلینگێ كری، ژیێ وێ 16 سال بوون، ل وی ده‌می ب تنێ وێ فێسبووك هه‌بوو، هه‌ر ده‌مێ وێ وێنێن خوه پۆست دكرن، گه‌له‌ك ره‌خنه و ده‌ست خۆشی بۆ وێ دهاتن، ل دووڤدا وێ وێنێن خوه ل ئینیستیگرامی پۆست كرن و حه‌ژێكه‌رێن وێ ناڤێ وێ كره شاهجوانا ئینیستیگرامی، ئه‌ڤێ ژی بارێ وێ گرانتر لێكر، له‌وما وێ ب ره‌نگه‌كێ به‌رده‌وام وێنێن خوه به‌لاڤكرن، هه‌روه‌سا دناڤا سۆشیال میدیایێ دا ناڤداربوو، هه‌ر چه‌نده كارێ وێ یێ مۆدیلینگێ ب دلێ خێزانا وێ نه‌بوو، لێ ئه‌و یا ل سه‌ر كارێ خوه به‌رده‌وامه).
ناڤهاتیێ ئه‌و یه‌ك ژی دیار كر ئه‌و شه‌یدایا هونه‌رێ سینه‌مایێ یه، حه‌ز دكه‌ت وه‌كو ئه‌كته‌ر پشكداریێ د فلمێن كوردی دا بكه‌ت، هه‌ر چه‌نده ل نه‌رویج داخواز ژێ هاتیه كرن، كو پشكداریێ د فلمێن نه‌رویجی دا بكه‌ت، لێ ئه‌و حه‌ز دكه‌ت پشكداریێ د فلمێن كوردی دا بكه‌ت، هه‌روه‌سا ئه‌و حه‌ز دكه‌ت، كارێن خوه ل كوردستانێ ئه‌نجام بده‌ت، چونكی پتریا حه‌ژێكه‌رێن وێ خه‌لكێ كوردستانێ نه، دیسان ئه‌و به‌رده‌وام پۆستێن نوو به‌لاڤه دكه‌ت، چونكو وێ گه‌له‌ك حه‌ژێكه‌ر هه‌نه، هه‌رده‌م د سۆشیال میدیایێ دا ئه‌و وه‌كو كه‌سه‌كا كه‌یفخۆش خوه نیشان دده‌ت.
ئه‌و چه‌ند ژی گۆت: (گه‌له‌ك جاران د سۆشیال میدیایێ دا خه‌لك داخوازی ژێ دكه‌ن، كو ئه‌و شوو پێ بكه‌ت، به‌لێ وێ نه‌ڤێت ب رێیا سۆشیال میدیایێ دا شوو بكه‌ت، هه‌روه‌سا نوكه ئه‌و د ژیێ 24 سالیێ دایه و زوویه بۆ شووكرنێ، له‌وما وێ بریاردایه د ژیێ 27 سالیێ دا شوو بكه‌ت).
