حه‌ز ل سه‌ر كه‌نالێن بیانی هه‌یه
:زاخۆ، عه‌لی حاجی
ژڤان سه‌عید، كچه‌كا میدیاكاره ل قه‌زا سێمێلێ دژیت، د دیداره‌كێ دا بۆ رۆژناما ئه‌ڤرۆ دیاركر كو وێ دخواست ب رێیا كه‌نالێن عه‌ره‌بی بهێته دناڤ راگه‌هاندنێ دا و ب گۆتنا وێ ده‌رگه‌هێن جڤاكی به‌رامبه‌ر كچێن راگه‌هاندكار هاتینه ڤه‌كرن و نوكه ب چاڤه‌كێ مه‌زن به‌رێ خوه دده‌نێ.
ژڤانێ گۆت: ئه‌ز ده‌رچوویا پشكا راگه‌هاندنێ مه ل زانكۆیا پولی ته‌كینك/دهۆك، پشتی من ئه‌و پشك ب دووماهی ئینای هه‌ر ئێكسه‌ر من دخواست ل ده‌لیڤه‌كا باش بگه‌رم، كو ئه‌و ژی هه‌ر د ئه‌ڤ ساله دا من ل كه‌نالێ زاگرۆس یێ عه‌ره‌بی وه‌كو په‌یامنێر ده‌ست ب كاری كر و ئه‌ڤه ژی ده‌لیڤه‌كا باشه ژ بۆ من ژبه‌ركو زێده‌تر من حه‌ز ل سه‌ر كه‌نالێن عه‌ره‌بی هه‌یه و من دڤێت بۆ خه‌لكی ژی دیار بیت كو راگه‌هاندن ژی كاره و مالا من رێگری ل من نه‌كری نه و تشته‌كێ نۆرماله ژی د مالا من دا بشێم ڤی كاری بكه‌م و ل باژێرێ سێمێلێ ژی پشته‌ڤانی ل كچێ دهێته‌كرن كو دناڤ راگه‌هاندنێ دا كار بكه‌ت و دیتنا جڤاكی ژی هاتیه گوهۆرین.
