حه‌ز ژ كچه‌كێ دكه‌م و نه‌شێم بخوه بخوازم
ئه‌ڤرۆ نيوز:
گه‌نجه‌كێ 26 سالی دلێ خوه بو ئه‌ڤرو ڤه‌دكه‌ت و دبێژیت: من قوناغا دوازدێ خلاس كریه و خودان دكانم و كارێ من یێ باشه، ئه‌ڤه سێ ساله ئه‌ز و كچه‌كا 27 سالی حه‌ز ژ ئێكدو دكه‌ین وێ ژی زانكو خلاس كریه و ماموستایه، لێ مالا من بتایبه‌ت دایك و بابێ من ب چ ره‌نگا رازی نابن ئه‌ز بخوه بخوازم، دبێژن ژ ته مه‌زنتره و خه‌لك دێ لومه‌یی مه كه‌ن، ئه‌ز نزانم چبكه‌م، هه‌كه ب زوری مال رازی بكه‌م و بینم و پاش بو من نه‌خوش بیت، نزانم پاشه‌روژا من دێ یا نه‌خوش بیت یان نه، ئه‌ڤجا هیڤیدارم هوون چ دبێژن و ئه‌ز چ بكه‌م؟
گه‌نجێ هێژا:
ل ده‌ستپێكێ پسیارا خوه بكه كا ئه‌ڤه حه‌زژێكرنه یان نه و تو ژ دل حه‌ز ژێ دكه‌ی، چونكی ئه‌گه‌رێن ته وه‌كی هێجه‌تانه، حه‌زژێكرنا دروست و راسته‌قینه هه‌ر پێدڤی ب ڤان پرسیارا نینه مروڤ بكه‌تن، سه‌باره‌ت خه‌لكی و لومه‌یا وان هه‌ما باشتره ل گه‌ل هه‌وه بژین د مالدا، ماده‌م ژیانا هه‌وه هوسا دده‌ستێ خه‌لكی دایه و خه‌لك كونترولا ژیانا هه‌وه ب رێڤه دبه‌تن.
ژلایه‌كێ دیڤه بو ساله‌كێ ما ژبه‌ر چ دێ خه‌لك لومه‌یی هه‌وه كه‌ت، ئه‌رێ ما دێ ل سه‌ر داخوازنامێ ژیێ خوه و بووكێ نڤیسی ئه‌ڤێ چه‌ندێ قه‌ت نه‌كه رێگر؟!.
تشته‌كێ گه‌له‌ك جوانه هوون هه‌ردو خودان كارن و حه‌ز ژ ئێكدو دكه‌ن، به‌س ساله‌ك فه‌رقه و نه ئاریشه‌كا مه‌زنه تو دشێی مالا خوه رازی كه‌ی، سه‌باره‌ت پاشه‌روژێ كو تو دبێژی كا دێ یا خوش بیت یان نه؟ كه‌س ڤی تشتی نزانیت ژبلی خودایێ مه‌زن، به‌س هه‌كه تو لدووڤ ڤێ رێیه چاره‌سه‌ریێ بچی یا من بو ته گوتی حه‌تمه‌ن دێ ته پاشه‌روژه‌كا گه‌ش و خوش هه‌بیت.
به‌رسڤدان: ده‌روونناس ئاواز
گۆشا دلێ خۆ ڤه ل سه‌ر فه‌يسبۆكى
