حه‌مید ئیسماعیل: هه‌ڤڕكی ب سانه‌هی نینه و ده‌ست ژ هیڤیێن خوه به‌رناده‌ین
عەلی حاجی:
د داخویانیەکێ دا سەرپەرشتێ تیما فوتبۆلا یانه‌یا زاخۆ ئه‌وا پشكدار د خولا ستێرێن ئیراقێ دا بۆ رۆژنامەیا ئەڤرۆ دیار کر وەرزێ ئەڤ سالە گەلەک یێ ب زەحمەتە و ئاگرینه و هەموو تیمێن دەستپێکێ دشێن خولێ ببەن، لێ ئه‌م ژی دێ بزاڤێ كه‌ین و ئارمانجا مه‌یه پاراستنا سه‌رێ لیستێ.
زێدەتر حەمید ئیسماعیل گۆت: وەرزێ ئەڤ سالە یێ خولا ستێرێن ئیراقێ ئێک ژ زەحمەترین وەرزێ سالێ یە د دیرۆكا فوتبۆلا ئیراقێ دا ژبەرکو پشتی بۆرینا 20 یارییان هەتا رێزا هەشتێ د خولێ دا خالێن رێزبه‌ندیێ نێزیکی ئێکن و هەڤرکیێ ل سەر دەستڤەئینانا ناسناڤی دکەن بەروڤاژی وەرزێن پێشتر بتنێ چەند یانەیەکان هەڤڕکی دکرن، ئەڤ چەندە دێ بیتە ئەگەرەکێ سەرەکی خولا ستێرێن ئیراقێ بەر ب پێشڤە بچیت، وەکو یانەیا زاخۆ ژی دێ هەتا دووماهی چرکە شەری ل سەر ب دەست ڤەئینانا خولێ کەین ژبەرکو هەمی مەرجێن ب دەست ڤەئینانا ناسناڤی ل دەف تیما مە هەنە.
ناڤبری گۆت ژی: تیما مە ژ تیمێن گەلەک ب زەحمەتە و ئەم خودان سەرێ لیستا خولێ نە و دڤێت ئەم وێ رێزبەندیێ پارێزین و ژ دەست نەدەین هەتا خول ب دووماهی دهێت.
ل دووماهیێ گۆت ژی: هەمو یاریزان هەست ب بەرپرسیارەتیێ دکەن و هەمی یاریزان هەڤرکیێ دکەن ژ بۆ ب دەست ڤە ئینانا جهەکێ دناڤ پێکهاتەیێ سەرەکی دا و ئەڤە ژی دێ پتر روحیەتێ دناڤ تیما مە دا پەیدا کەت.
