حوكمه‌تا هه‌رێمێ پرۆژێن ئاكنجیبوونێ یێن كێم ده‌رمه‌تان دێ تمام كه‌ت
ئه‌ڤرۆ، سالار محه‌مه‌د دۆسكی:
به‌رپرسێ پلاندان و دووڤچوونێ ل رێڤه‌به‌ریا ئاڤه‌دانكرن و ئاكنجیكرنێ ل پارێزگه‌ها دهۆكێ ئاشكرا كر، دو به‌لنده‌رێن زاخۆ ل سه‌ر ئه‌ركێ خوه رابووینه ب ته‌مامكرنا پرۆژێن یه‌كێن ئاكنجیبوونێ و نوكه د قووناغا دووماهیێ دانه.
ئه‌ندازیار رێدیر سلێمان، به‌رپرسێ پلاندان و دووڤچوونێ ل رێڤه‌به‌ریا ئاڤه‌دانكرن و ئاكنجیكرنێ بۆ رۆژناما ئه‌ڤرۆ گۆت: “ل سالا 2011 بڕیار ل سه‌ر دروستكرنا یه‌كێن ئاكنجیبوونێ ل سه‌رانسه‌ری هه‌رێما كوردستانێ هاتبوو دان، ل سالا 2012 ل پارێزگه‌ها دهۆكێ پرۆژه كه‌فته د بیاڤێ ب جهئینانێ دا و پلان یا به‌رده‌وامه، ل هه‌ر دو سالێن ده‌ستپێكێ دو هزار و 440 یه‌كێن ئاكنجیبوونێ ل سنوورێن هه‌ر حه‌فت قه‌زایێن پارێزگه‌ها دهۆكێ هاتبوونه دروستكرن، هه‌ر پرۆژه‌كی رێژه‌كا ئه‌نجامدانێ ده‌ربازكربوو، ل سالا 2014 كاودانێن دارایی ئالۆز بوون و به‌رده‌اومی ب پرۆژه‌ی نه‌هاته‌دان و ژ به‌ر هاتنا داعش و بڕینا بودجا هه‌رێما كوردستانێ ژلایێ حوكمه‌تا عیراقێ ڤه پرۆژه هاتبوونه راگرتن”.
ئه‌ندازیار رێدیر گۆتژی: “ل سالا 2016 به‌لنده‌رێن كۆمپانیێن قه‌زا زاخۆ داخوازا كرن ل سه‌ر ئه‌ركێ خوه و وان پرۆژان ب دووماهی بینن، نوكه كارێ ل سه‌ر دهێته‌كرن و پرۆژه‌كێ زاخۆ نوكه ب رێژا 94% تمامبوویه و به‌ر ب دووماهیێ یه، ل دووماهی یا سالا بۆری و ل سه‌ر فه‌رمانا سه‌رۆكێ حوكمه‌تا هه‌رێما كوردستانێ كۆژمه‌كێ پاره‌ی بۆ پرۆژێن خزمه‌تگۆزاری ل زاخۆ هاته دابینكرن و كۆژه‌مه‌كێ وی پاره‌ی بۆ خزمه‌تگۆزیێن ئه‌ڤان پرۆژان هاته دابینكرن وه‌ك جاده و باغچه و یه‌كا چاره‌سه‌ریا ئاڤا گران و ئاڤ و كاره‌ب و گشت خزمه‌تگۆزاریێن دی”.
خویا ژی كر، نوكه پرۆژه ل هه‌ر حه‌فت قه‌زیێن دی د راگرتینه، ب تنێ هه‌ر دو پرۆژێن قه‌زا زاخۆ كار ل سه‌ر دهیته‌كرن، یه‌كێن ئاكنجیبوونێ ل سه‌ر زاخۆ 322 یه‌كه‌نه و گۆت: “به‌ری دو هه‌یڤان ل په‌رله‌مانێ كوردستانێ گه‌نگه‌شه هاتیه‌كرن كو ئه‌ڤ پرۆژێن یه‌كێن ئاكنجیبوونێ هه‌موویان كار ل سه‌ر بهێته‌كرن و وه‌زیرێ ئاكنجیبوونێ ژی بۆ بابه‌تی هاتبوو گازیكرن بۆ دووباره ده‌ست ب كاربوونا پرۆژان، بڕیاره ئه‌ڤ ساله كۆژمه‌كێ پاره‌ی بۆ ته‌مامكرنا وان بهێته ته‌رخانكرن، هه‌كه كاودانێن دارایی به‌ر ب باشیێ ڤه نه‌چوون، وه‌كو په‌رله‌مان ل گه‌ل وه‌زاره‌تا ئاڤه‌دانكرنێ هزره‌كا دی هه‌یه كو ئه‌ڤ یه‌كێن ئاكنجیبوونێ بۆ هنده‌ك وه‌به‌رهێنه‌رێن دی بهێنه‌دان و ژ یێن به‌ری نوكه بهێنه وه‌رگرتن”.
