حوكمه‌تا هه‌رێمێ پشته‌ڤانیا دارایی ل ئێكه‌تیا ته‌پا پێی یا كوردستانێ كر
ئه‌ڤرۆ،
د داخویانیه‌كێ دا ئه‌ندامێ ئێكه‌تیا ته‌پا پێی یا هه‌رێما كوردستانێ بۆ رۆژناما ئه‌ڤرۆ دیاركر ب كۆژمێ 400 ملیۆن دیناران حوكمه‌تا هه‌رێما كوردستانێ پشته‌ڤانیا ئێكه‌تیا وان كر ژبۆ چاره‌سه‌ركرنا ئاریشێن دارایی و بڕێڤه‌برنا چالاكیێن خوه یێن وه‌رزشی.
زێده‌تر ئازاد محه‌مه‌د گۆت: لدووڤ داخوازیا مه بۆ جه‌نابێ سه‌رۆكێ حوكمه‌تا هه‌رێما كوردستانێ رێزدار مه‌سرۆر بارزانی ب فه‌رمی بڕیارا مه‌زاختنا 400 ملیۆن دیناران بۆ ئێكه‌تیا ته‌پا پێی هاتیه دان و هه‌رزوو دێ هێته پارڤه‌كرن ل سه‌ر هه‌موو دادڤان، سه‌رپه‌رشتێن یاریا ئه‌وێن پشكداری د خولێن پلا نایاب، ئێك، دو و فۆتسالێ دا كرین وه‌كو ده‌رماله‌یێن شایسته و بڤێ چه‌ندێ دێ ئاریشێن مه یێن دارایی هێنه چاره‌سه‌ركرن، له‌ورا ئه‌م سۆپاسیا حوكمه‌تا هه‌رێما كوردستانێ دكه‌ین كو پشته‌ڤانیا دارایی بڤی شێوه‌یی بۆ وه‌رزشا كوردستانێ كری و ئه‌ڤه پێنگاڤه‌كا مه‌زنه بۆ پێشخستنا وه‌رزشێ و پووته‌دانا حوكمه‌تێ ژی مه‌زنترین پشته‌ڤانیه.
ژلایه‌كێ دووڤه ناڤهاتی ئه‌وچه‌نده ژی دیاركر كو بۆ وه‌رزێ بهێت یێ چالاكیێن خولا پلا نایاب، ئێك، دو و فۆتسالێ دێ پلانێن دارشتی و رێنومایێن زێده‌تر هه‌بن ژبۆ بڕێڤه‌برنه‌كا باشتر و سه‌ركه‌فتی كو خشته‌ك و ژڤان یێن رێكخستی بن و هه‌موو یانه مفاداربن، دیسان دێ تاقیكرنێن تیۆری و پراكتیكی بۆ هه‌موو دادڤان و سه‌رپه‌رشتێن یاریا هێنه‌كرن و باشترین شێوه بشێن یاریا بڕێڤه‌به‌ن.
