حوكمه‌ت دێ پاره‌ی بۆ به‌رهنگاریا هشكه‌سالیێ مه‌زێخیت
هه‌ولێر، قائید میرۆ:
بڕیاره حوكمه‌تا هه‌رێما كوردستانێ بۆ به‌رهنگاربوونا هشكه‌سالیێ هاریكاریا جۆتیارێن زیاندار بكه‌ت و په‌یڤدارێ وه‌زاره‌تا چاندنێ ژی دبێژیت: مه داخوازا مه‌زاختنا پاره‌یه‌كێ تایبه‌ت بۆ هشكه‌سالیێ یێ كری.
حوسێن حه‌مه كه‌ریم، په‌یڤدارێ وه‌زاره‌تا چاندنێ بۆ رۆژناما ئه‌ڤرۆ دیار كر، ل هنده‌ك ده‌ڤه‌رێن وه‌كو گه‌رمیان هشكه‌سالی هاتیه راگه‌هاندن و هنده‌ك ده‌ڤه‌ران ژی مه‌ترسیا هشكه‌سالیێ یا ل سه‌ر هه‌ی، له‌وڕا وه‌زاره‌تا چاندنێ پلانه‌ك بۆ به‌رهنگاربوونا هشكه‌سالیێ یا هه‌ی و گۆت: “مه داخوازا مه‌زاختنا بودجه‌یه‌كا تایبه‌ت بۆ هشكه‌سالیێ یا كری، چونكو هشكه‌سالیێ دێ زیانێن خوه ل سه‌ر هه‌موو كه‌رتان هه‌بن، ب تایبه‌تی ژی كه‌رتێ چاندنێ دێ تووشی زیانێن مه‌زن بیت و به‌رهه‌مێ ئه‌ڤ ساله وه‌كو پێدڤی نابیت”.
حوسێن حه‌مه كه‌ریم گۆتژی: “پلانا وه‌زاره‌تا چاندنێ ئه‌ڤه‌یه، كو هاریكاریا جۆتیاران بكه‌ت و ئالفی بۆ ئاژه‌لێن وانا دابین بكه‌ت، هه‌روه‌سا جۆتیارێن به‌رهه‌مێ گه‌نمی چاندی دێ هاریكاری بۆ هێنه كرن، هه‌رچه‌نده پێشبینی دهێته كرن به‌رهه‌مه‌كێ لاواز و كێم ژی ئه‌ڤ ساله هه‌بیت، بڕیاره به‌رهه‌مێ گه‌نمی ژ لایێ ئیراقێ ڤه بۆ هه‌رێما كوردستانێ ل ده‌رڤه بهێته كڕین، چونكو پێشبینی دهێته كرن، به‌رهه‌مێ ناڤخوه 300 هزار ته‌ن بن و ئه‌ڤه ژی تێرا ئه‌ڤ ساله بۆ پێدڤیێن ناڤخوه ناكه‌ت”.
