حوكمه‌ت و ئۆپۆزسیۆنا سووریێ ل دۆر ناڤه‌رۆكا دستوورێ نوو رێككه‌فتن
ئه‌ڤرۆ:
نوونه‌رێ تایبه‌ت یێ نه‌ته‌وه‌یێن ئێكگرتی بۆ كاروبارێن سووریێ راگه‌هاند كو نوونه‌رێن ئۆپۆزسیۆنێ و حوكمه‌تا سووریێ ل دۆر ناڤه‌رۆكا دستووره‌كێ نوو بۆ سووریێ رێككه‌فتینه و د كۆمبوونێن داهاتی دا دێ كار بۆ ئاماده‌كرنا دستووره‌كێ نوو بۆ سووریێ هێته كرن، چونكو دستوور دێ بیته ژێده‌رێ چاره‌سه‌ریا قه‌یرانا نها ل سووریێ.
گیر پیدرسن نوونه‌رێ تایبه‌ت یێ نه‌ته‌وه‌یێن ئێكگرتی بۆ كاروبارێن سووریێ راگه‌هاند كو پشتی بزاڤێن به‌رده‌وام یێن ئه‌مریكا، رۆسیا و نه‌ته‌وه‌یێن ئێكگرتی د ئه‌نجام دا حوكمه‌تا سووریێ و ئالیێن ئۆپۆزسیۆنێ ل دۆر ناڤه‌رۆكا دستووره‌كێ نوو بۆ سووریێ رێككه‌فتینه و د چه‌ند رۆژێن داهاتی دا كۆمبوونێن نوو دێ برێڤه چن و ئه‌و یه‌ك ژی بۆ پاشه‌رۆژا سووریێ گه‌له‌ك گرنگه و گۆت: (به‌ری نها مه گه‌له‌ك بزاڤ كرن كو نوونه‌رێن حوكمه‌تا سووریێ و ئالیێن ئۆپۆزسیۆنێ ل دۆر چاوانیا ئاماده‌كرنا دستووره‌كێ نوو بۆ سووریێ پێكڤه كار بكه‌ن، لێ مخابن گه‌له‌ك ناكۆكی د ناڤبه‌را هه‌ر دو ئالیان دا هه‌بوو لێ نها هه‌ر دو ئالی ل دۆر ناڤه‌رۆكا دستووره‌كێ نوو بۆ سووریێ رێككه‌فتینه و ئه‌و یه‌ك ژی پێنگاڤه‌كا گه‌له‌ك گرنگه، چونكو دستوورێ نوو یێ سووریێ دێ بیته ژێده‌رێ چاره‌سه‌ریا هه‌موو ئاریشێن نها ل سووریێ، ژ به‌ر هندێ ژی مه دڤێت ئه‌مریكا، رۆسیا و هه‌موو وه‌لاتێن دی یێن جیهانێ پشته‌ڤانیێ ل چاره‌سه‌ریا سیاسی بۆ سووریێ بكه‌ن).
ناڤهاتی ئه‌و یه‌ك ژی دیار كر كو د ئه‌نجاما شه‌رێ چه‌ندین سالێن بۆری ل سووریێ دا گه‌له‌ك وه‌لاتیێن سڤیل جانێ خوه ژ ده‌ست داینه، ب هزاران وه‌لاتی ئاواره بووینه و نها ژی ره‌وشا ئابووری یا سووریێ گه‌له‌ك خرابه، وه‌كو نه‌ته‌وه‌یێن ئێكگرتی مه پێ باشه كو حوكمه‌ت و ئۆپۆزسیۆنا سووریێ پێكڤه هه‌موو ئاریشێن هه‌ی ب رێیێن سیاسی چاره‌سه‌ر بكه‌ن، دانوستاندن گه‌له‌ك گرنگن، دڤێت ده‌رگه‌هێن دانوستاندنان نه‌هێنه داخستن، به‌ری نها ره‌وش گه‌له‌ك ئالۆز بوو لێ نها قۆناغه‌كا نوو بۆ سووریێ ده‌ستپێكریه و گۆت: (ئه‌مریكا و رۆسیا ژی پشته‌ڤانیێ ل چاره‌سه‌ریا سیاسی بۆ سووریێ دكه‌ن، به‌ری نها نه‌ته‌وه‌یێن ئێكگرتی ژی گه‌له‌ك بزاڤ كرینه كو نوونه‌رێن حوكمه‌تێ و ئۆپۆزسیۆنا سووریێ ب رێیا دیالۆگێ هه‌موو پرسێن هه‌ی چاره‌سه‌ر بكه‌ن، نها هه‌ر دو ئالی ل دۆر ناڤه‌رۆكا دستووره‌كێ نوو بۆ سووریێ رێككه‌فتینه كو ئه‌و یه‌ك ژی بێگومان گه‌له‌ك گرنگه، چونكو دێ قۆناغه‌كا نوو ل سووریێ ده‌ستپێكه‌ت، دڤێت ل سووریێ هه‌موو پێكهاته و خه‌لكێن وی وه‌لاتی بگه‌هنه مافێن خوه، ژ به‌ر هندێ ژی ئه‌م دبێژین كو دستوورێ نوو یێ سووریێ دڤێت ببیته ژێده‌رێ چاره‌سه‌ریا هه‌موو قه‌یرانان و بێگومان دڤێت د ئاماده‌كرنا دستوورێ نوو دا هه‌ر دو ئالی ژی هاریكاریا هه‌ڤدو بكه‌ن).
چاڤدێرێن سیاسی ژی دیار دكه‌ن كو به‌ری نها رۆسیا و ئه‌مریكا ل دۆر چاره‌سه‌ریا قه‌یرانا سووریێ رێككه‌فتینه، چونكو شه‌رێ ل سووریێ زیانا خوه بۆ رۆسیا و ئه‌مریكا هه‌یه، ژ به‌ر هندێ ژی پشتی سه‌ره‌دانا به‌شار ئه‌سه‌دی بۆ رۆسیا و هه‌روه‌سا سه‌ره‌دانا شاندێ رۆژئاڤایێ كوردستانێ بۆ ئه‌مریكا و رۆسیا ره‌وشه‌ك نوو هاته پێش، چونكو د دستوورێ نوو دا دڤێت هه‌موو مافێن كوردان و نه‌ته‌وه‌یێن دی بهێنه گه‌ره‌نتیكرن و به‌ری نها چه‌ندین جاران وه‌زیرێ ده‌رڤه یێ رۆسیا ژی دیار كریه كو دڤێت دستوورێ نوو یێ سووریێ ببیته ژێده‌رێ چاره‌سه‌ریێ و هه‌موو خه‌لكێن سووریێ بشێن ب رێیا دستوورێ نوو بگه‌هنه مافێن خوه، ژ به‌ر هندێ ژی بزاڤێن نها یێن بۆ ئاماده‌كرنا دستووره‌كێ نوو دێ ئه‌نجامێن خوه یێن باش بۆ پاشه‌رۆژا سووریێ هه‌بن.
