حوكمەتا ئیراقێ بۆ ڤەگەڕاندنا ئاوارەیان یا رژد نینە
هەولێر، قائید میرۆ
رێڤەبەرا گشتیا بەرهنگاربوونا قەیرانان ل هەرێما كوردستانێ ئاشكراكر، هەرێما كوردستانێ ب زۆری ئاوارەیان ڤەناگەڕینیت بۆ دەڤەرێن وان و نوكە ئەم مژوولی بەرهەڤكرنا پڕۆژەیەكی نە ژ بۆ چارەسەركرنا ئاریشەیا ئاوارەیان و دبێژیت: حوكمەتا ئیراقێ یا رژد نینە لسەر ڤەگەڕیانا ئاوارەیان.
سروە رەسول، رێڤەبەرا گشتیا بەرهنگاربوونا قەیرانان ل وەزارەتا نافخۆ بۆ رۆژناما ئەڤرۆ دیار كر «ل هەرێما كوردستانێ نوكە نێزیكی ئێك ملیۆن و 230 هزار ئاوارە و پەنابەر هەنە و حوكمەتا ئیراقێ ژی بڕیار دایە هەتا دوماهیا هەیڤا داهاتی هەموو ئاوارەیێن ئیراقێ بهێنە ڤەگەڕاندن، سیاسەتا حوكمەتا هەرێما كوردستانێ ژی دەربارەی ئاوارەیان ئەڤە كەس ب زۆری ناهێتە ڤەگەڕاندن وەك ئاوارە و بەری نوكە ژی سیاسەتا حوكمەتا هەرێما كوردستانێ یا ئاشكرابوویە لدۆر پرسا ئاوارەیان.
زێدەتر گۆت: بەری نوكە پڕۆژەیەك هاتبوو بەرهەڤكرن و نەتەوێن ئێكگرتی و حوكمەتا ئیراقێ َژی تێدا پشكداربوون، بەلێ ئەم نێزیكی دووماهیێ بووین ئێكسەر وەزارەتا كۆچ و كۆچبەرێن ئیراقێ بڕیارا ڤەگەڕاندنا ئاوارەیان دەركر، ڤێ چەندێ ژی گومان پەیداكریە چاوا دگەلمە پشكداربوون بۆ بەرهەڤكرنا پڕۆژێ ڤەگەڕیانا ئاوارەیان پشكداربوون، بەلێ مخابن نئێك لایەن بڕیاردایە ل دۆر ئاوارەیان، مخابن چو بەرهەڤی بۆ ڤەگەڕیانا ئاوارەیان نەهاتیەكرن و حوكمەتا ئیراقێ ژی یا رژد نینە بۆ ڤەگەڕیانا ئاوارەیان و چەندین ئاریشە هەنە یێن ئاوارەیان نەهاتینە چارەسەركرن، هەر چەندە بڕیار هاتیەدان بۆ ڤەگەڕیانا ئاوارەیان، بەلێ هەتا نوكە تنێ سەدێ ئێك ژی یا ئاوارەیان ڤەنەگەڕیانە.
سروە رەسول ئاماژەكر» پێنگاڤێن كریاری و جدی نینە بۆ ڤەگەڕاندنا ئاوارەیان، لەوڕا ژی مەرەمێن دی هەنە ل دۆر بڕیارا ڤەگەڕاندنا ئاوارەیان، نوكە ژی ئەم مژوولی پڕۆژەیەكینە و نەتەوێن ئێكگرتی و حوكمەتا ئیراقێ ژی تێدا پشكدارن، بەلێ ئاریشە ئەڤە حوكمەتا ئیراقێ یا خەمسارە و جدی نینە لدۆر پرسا ئاوارەیان بۆ نموونە ئەو دەڤەرێن ئاوارە بڕیارە بۆ بهێنە ڤەگەڕاندن ئاریشە هەنە و رێ نەهاتیە خۆشكرن بۆ ڤەگەڕیانا ئاوارەیان، هەتا رەوشا دەڤەرێن وان ژی تەناهیێ بخۆڤە نەبینیت ئاوارە زەحمەتە ڤەگەڕن بۆ نموونە چەندین ئاریشەیێن قانوونی هەنە ئاوارەیان نەهاتینە ئێكلاكرن، رەوشا شنگالێ ئاستەنگ بۆ خەلكێ دەڤەرێ پەیداكرینە و ئالۆزیێن شنگالێ و ڤەگەڕیانا ئاوارەیان گرێدایی بجهئینانا رێكەفتنا شنگالێ یە.
