حوكمەتا ئیراقێ بزاڤێ بۆ لاوازكرنا ئابووریا هەرێما كوردستانێ دكەت
زاخۆ، دلۆڤان هالۆ:
ڕێڤەبەرێ ژوورا بازرگانی و پیشەسازی ل ئیدارەیا سەربخوە یا زاخۆ دیار كر، حوكمەتا ئیراقێ هەموو پێكولان ژ بۆ لاوازكرنا بازرگانی و ئابووریا هەرێما كوردستانێ دكەت، و بریارێن نە ڕەوا ل دژی بازرگانێن مە ددەت.
لەتیف ئۆسمان، ڕێڤەبەرێ ژوورا بازرگانی و پیشەسازی ل ئیدارەیا سەربخوە یا زاخۆ بۆ ڕۆژناما ئەڤرۆ دیار كر، ل دونیایێ هەموویێ نینە د وەلاتەكێ دا دناڤبەرا باژێڕەكێ بۆ باژێڕەكێ دی دا زالگەهێن گۆمركی بهێنە دانان و بۆ ئێك بارهەلگرا پێدڤی و كەلوپەلان دوو باجێن گۆمركی بهێنە دان.
ناڤهاتی ئاماژە ب وێ چەندێ ژی كر، ژ بۆ ئینانا هەر بارهەلگرەكا پێدڤی و كەلوپەلان ژ دەرڤەی وەلاتی بۆ ناڤ هەرێما كوردستانێ و ئیراقێ، بازرگانێن مە ل گۆمركا ئیبراهیم خەلیل باجەكا گۆمركی ژ بۆ بارهەلگرێن خوە ددەن، ل زالگەها مووسلێ ژی باجەكا دی یا گۆمركی ددەن.
گۆت ژی:”ئەڤ جۆرێ سەرەدەریكرنێ و بریارێن نە ڕەوا یێن حكۆمەتا ئیراقێ لگەل بازرگانێن مە، كارتێكرنەكا مەزن ل سەر كارێ بازرگانیێ ل هەرێما كوردستانێ كریە و ئابووریا وێ لاواز كریە”.
