حوكمەتا ئیراقێ حەفت دەرگەهێن سنووریێن هەرێمێ ب نەفەرمی ناڤكرینە
هەولێر، قائید میرۆ:
رێڤەبەرێ گشتیێ گومركێن هەرێما كوردستانێ ئاشكرا كر، هەموو دەرگەهێن هەرێما كوردستانێ ل گەل وەلاتێن دەوروبەر فەرمینە، بەلێ حوكمەتا ئیراقێ حەفت دەرگەهێن هەرێمێ ب نەفەرمی وەسف دكەت و دبێژیت: مە داخوازا پێداچوونێ ب ڤێ بڕیاری یا كری.
سامال عەبدولڕەحمان، رێڤەبەرێ گشتیێ گومركێن هەرێما كوردستانێ بۆ رۆژناما ئەڤرۆ دیار كر، هەرێما كوردستانێ حەفت دەرگەهێن سنووری ل گەل وەلاتێن هەڤسوو هەنە و ژ لایێ هەرێما كوردستانێ ڤە دەرگەهێن فەرمینە و ژ ئالیێ حوكمەتا ئیراقێ ڤە ب نەفەرمی دهێنە هەژمارتن و گۆت: «مە دخوازكریە ل بەغدا لژنەك بهێتە پێكئینان بۆ چارەكرنا ئاریشەیا وان دەرگەهێن سنووری، ئەو دەرگەهێن ئیراق ب نەفەرمی وەسف دكەت هەموو مەرجێن دەرگەهێن سنووری یێن فەرمی تێدا هەنە و داخواز دكەین پێداچوون د بڕیارێ دا بهێتە كرن ل دۆر بڕێڤەبرنا كاروبارێن وان دەرگەهێن سنووری، هەتا ژ ئالیێ بەغدا ژی ڤە ببنە فەرمی».
سامال عەبدولڕەحمان گۆتژی: «مە جارێ ل بەر نینە چو دەرگەهێن سنووری یێن نوو ڤەكەین و هەردەمێ مە پێدڤی ب دەرگەهێن نوو هەبیت، ئەڤە بێگومان ل گورەی پێدڤی دێ بڕیار ل سەر هێتەدان، بەلێ جارێ ئەم یێ بزاڤان دكەین دەرگەهێن نوكە هەین ب فەرمی ژ لایێ حوكمەتا ئیراقێ ڤە بهێنە تۆماركرن».
