حوكمەتا هەرێمێ قۆناغا دویێ یا پشتەڤانییا دارایی بۆ فیدارسیۆنا تەپا پێی یا كوردستانێ هنارت
ل سەر راسپاردەیا مەسرۆر بارزانی سەرۆكێ حوكمەتا هەرێما كوردستانێ ب فەرمی بڕیار هاتە دان قۆناغا دویێ یا پشتەڤانییا دارایی بۆ فیدارسیۆنا تەپا پێی یا كوردستانێ بهێتە هنارتن، ژبۆ بڕێڤەبرنا كار و چالاكیێن خوە و دانا قەرێن سەرپەرشتیار و دادڤانێن پشكدار د خولێن وەرزێ بۆری دا.
ئازاد محەمەد ئەندامێ فیدارسیۆنا تە پاپێی یا كوردستانێ بۆ رۆژنامەیا ئەڤرۆ گۆت: ب ڕێیا ئەنجوومەنی وەزیران و ل سەر راسپاردا مەسرۆر بارزانی سەرۆكێ حوكمەتا هەرێما كوردستانێ بڕیار هاتییە دان پشتەڤانییا دارایی یا قۆناغا دویێ بۆ فیدارسیۆنا مە بهێتە تەرخانكرن، ئەڤچەندە ژی وەكو پشتەڤانییا بەردەوام یا حوكمەتا هەرێمێ بۆ كەرتێ وەرزشێ ب گشتی و تایبەت یارییا تەپا پێی، ئەڤ پێنگاڤە ژی بوویە ئەگەر وەرزش زێدەتر رۆلێ خوە بینت و بەر ب پێشڤە بچیت.
هەروەسان ناڤهاتی گۆت: ژ سەرجەمێ گشتی یێ پشتەڤانییا دارایی یا حوكمەتا هەرێما كوردستانێ بۆ فیدارسیۆنا تەپا پێی رازیبوون ل سەر 854 ملیۆن دیناران هاتبوو دان، قۆناغا ئێكێ بەری دو مەهان ب كۆژمەیێ 288 ملیۆن دینار هاتبوونە دان و ل سەر دادڤان و سەرپەرشتیاریێن یاریێن خولا پلا نایاب، ئێك بۆ پێشكەفتی، لاوان و تازەپێگەهشتیان، هەروەسان بڕیارە د ڤێ حەفتیێ دا قۆناغا دویێ یا پشتەڤانییا دارایی وەربگرین پشتی رازیبوون ل ئەنجوومەنی وەزیران هاتییە دان كو دێ بۆ سەرپەرشتیار، دادڤانێن پلا دو، سێ، لاوان و تازەپێگەهشتییان و فۆتسالێ بن، دیسان دێ بۆ بەرهەڤیێن وەرزێ نوو یا خولا پلا نایاب و ئێك یێن 2023-2024 تایبەت بۆ خولێن بهێزكرنێ یێن دادڤانان و تاقیكرنێن سەرپەرشتیاران.
ژلایەكێ دووڤە ئازاد محەمەد ئەوچەندە ڕەدكر چو یانەیان خوە ژ خولا كوردستانێ نە ڤەكێشایە و گۆت: هەتا نوكە چو نڤێسارێن فەرمی بۆ مە ژ چو یانەیێن پشكدار د خولا پلا نایابا كوردستانێ دا نە هاتینە و ب دیتنا من هەردو یانەیێن دهۆك و ئارارات ژی دێ پشكداریێ كەن، هەروەسان ژڤانێ خولێ نە هاتییە گوهۆڕین ئەوا بڕیارە ل 25ێ ڤێ هەیڤێ بهێتە كرن.
