حوكمەت دێ نەهـ هزار یەكەیێن ئاكنجیبوونێ دەتە وەلاتیێن هەژار و كرێدار
هەولێر، قائید میرۆ:
وەزیرێ ئاڤەدانكرنێ هووركاریێن بەلاڤكرنا فۆرمێن شوقەیێن حوكمەتێ ئاشكراكرن و دبێژیت: هەتا سێ مەهێن دی وەلاتیێن كرێدار و هەژار دشێن فۆرما وەرگرتنا شوقەیان ب شێوەیێ ئونلاین تژی بكەن.
دانا عەبدولكەریم، وەزیرێئاڤاكرنێ دوهی 8/8/2023 ل باژێڕێ هەولێرێ د كۆنفڕانسەكێ رۆژمنامەڤانی دا راگەهاند: «زێدەتری نەه هزار یەكەیێن ئاكنجیبوونێ ژ لایێ حوكمەتا هەرێما كوردستانێ ڤە هاتینە ئاڤاكرن و هندەك ژ وان تەمامبووینە و كاركرن یا بەردەوامە بۆ تەمامكرنا یێن مایی، دوهی وێبسایتێ تژیكرنا فۆرمێن یەكەیێن ئاكنجیبوونێ هاتیە كاراكرن و بۆ دەمێ سێ مەهان دێ بەردەوام بیت، ئانكو وەلاتی نوكە هەتا سێ مەهێن دی دشێن فۆرمەكێ تژی بكەن ب رێیا ئونلاین و ل گورەی زانیاریێن ناڤا فۆرمێ زانیاریێن خوە تۆمار بكەن، ل گورەی قانوونا ئاكنجیبوونێ دێ مەرج و رێنمایی هەبن بۆ كەسێن بڕیارە ژ وەرگرتنا شوقەیێن حوكمەتێ مفاداربن».
دانا عەبدولكەریم گۆت: «پشتی وەرگرتنا فۆرمێن وەلاتیان دێ ل گورەی پێدڤی كار ل سەر ڤاڤارتنا فۆرمان هێتە كرن و ل گورەی سنورێ ئاكنجیبوونێ، ئەو یەكەیێن هاتینە ئاڤاكرن ب قستێ 25 سالان ل سەر وەلاتیان دێ هێنە بەلاڤكرن، ب هەڤكاری ل گەل كۆمەلەیا كرێداران و لایەنێن پەیوەندیدار فۆرمە هاتیە بەرهەڤكرن، ل هەموو دەڤەران ژی ئەو یەكە هاتینە ئاڤاكرن و هەموو بزاڤەك ژی دهێتە كرن بۆ تەمامكرنا وان شوقەیێن هەتا نوكە نەهاتینە تەمامكرن».
