حوكمەت دێ رێكارێن دژوار هەمبەر بازرگانێن ماددەیێن هۆشبەر ب كارئینیت
هەولێر، قائید میرۆ:
ئەندامەكێ لیژنا بلندا بەرهنگاربوونا ماددەیێن هۆشبەر ئاشكرا كر، حوكمەت دێ رێكارێن دژوار هەمبەر بازرگانێن ماددەیێن هۆشبەر ب كارئینیت و دبێژیت: سەنتەرێن چارەسەركرنێ بۆ كەسێن تووشی ب كارئینانا ماددەیێن هۆشبەر بووین؛ دێ هێنە ڤەكرن.
كرمانج عوسمان، ئەندامێ لیژنا بلندا بەرهنگاربوونا ماددەیێن هۆشبەر بۆ رۆژناما ئەڤرۆ دیاركر، حوكمەتا هەرێما كوردستانێ پێرابوونێن دژوار هەنە هەمبەر وان كەسێن بازرگانیێ ب ماددەیێن هۆشبەر دكەن یان ژی بكار دئینن و گۆت: «هەتا نوكە پێنگاڤێن باش بۆ بەرهنگاربوونا ماددەیێن هۆشبەر هاتینە هاڤێتن، بڕیارە سەنتەرێن چارەسەركرنێ ژی بۆ كەسێن تووشی ب كارئینانا ماددەیێن هۆشبەر دبن؛ بهێنە ڤەكرن».
كرمانج عوسمان گۆتژی: «خەلكەكێ زۆر بووینە قوربانی ماددەیێن هۆشبەر و ئامارێن مەترسیدار هەنە، بازرگانێن ماددەیێن هۆشبەر بووینە ئەگەر خەلكەكێ زۆر ببیتە قوربانی، لەوڕا ژی وەكی حكومەت ئەم یێ كار بۆ كێمكرنا هژمارا قوربانیان دكەین، چونكی ماددەیێن هۆشبەر بووینە پرسەكا جیهانی و هەر جڤاكەكێ ماددەیێن هۆشبەر بچنە د ناڤ دا دێ وێران كەن، لەو پێدڤیە وەلاتی د هشیاربن و بزانن مەترسیێن ب كارئینانا ماددەیێن هۆشبەر چەندن».
