حوكمەت هۆشداریێ ددەتە هندەك كۆمپانیان
هەولێر، قائید میرۆ:
رێڤەبەریا گشتیا حەج و عومرێ ل هەرێمێ هۆشداریێ ددەتە وان كۆمپانیێن بەری حوكمەتێ بانگەشەیێ بۆ دەستپێكرنا گەشتێن عومرێ دكەن و پەیڤدارێ حەج و عومرێ ژی دبێژیت: هەر كۆمپانیەكا بەری حوكمەتێ بانگەشەیێ بكەت، لێپرسین د گەل دا دێ هێتە كرن و هێتە سزادان.
كاروان ستوونی، پەیڤدارێ حەج و عومرا هەرێما كوردستانێ بۆ رۆژناما ئەڤرۆ دیاركر، چو كۆمپانیەك نەشێت ژڤانێ دەستپێكرنا گەشتێن عومرێ بۆ وەلاتێ سعوودیێ دیار بكەت و گۆت: «ب تنێ وەزارەتا ئەوقاف و كاروبارێن ئایینی دشێت ژڤانێ دەستپێكرنا گەشتێن عومرێ دیار بكەت، بەری پرۆسەیا حەجا ئەڤ سالە ژی هەموو كۆمپانیێن كارێ حەج و عومرێ دكەن، هاتینە ئاگەهداركرن و نابیت چو كۆمپانی بانگەشەیێ بۆ دەستپێكرنا گەشتا عومرێ بكەن».
گۆتژی: «هەر كۆمپانیەكا ریكلامێ بۆ دەستپێكرنا گەشتێن عومرێ بكەت، ل گورەی قانوونێ لێپرسین د گەل دا دێ هێتە كرن، نابیت ب چو شێوەیەكی كۆمپانیێن مۆهلەت هەین ریكلامێ بكەن، هەتا حوكمەت ژڤانێ دەستپێكرنا گەشتێن عومرێ دیار نەكەت».
