حوکمەتا عیراقێ بودجا دو سالان دێ کەتە ئێک پرۆژە قانوون
ئەڤرۆ:
ئەندامەکێ لیژنا دارایی ل جڤاتا نوونەرێن عیراقێ دیار کر کو حوکمەتا عیراقێ ھەردو پرۆژە قانوونێن بودجا سالا 2014 و 2015 دێ کەتە ئێک و پێکڤە ھنێرتە پەرلەمانی.
قادر محەمەد، ئەندامێ لیژنا دارایی ل جڤاتا نوونەرێن عیراقێ بۆ خەندان راگەھاند، ھەردو پرۆژە قانوونێن بودجا ئەڤ سالە 2014 و سالا بھێت 2015 پێکڤە وەکو ئێک پرۆژە قانوون دێ رەوانەی جڤاتا نوونەران کەت و گۆت: “ژ بەر دو ئەگەران حوکمەتا عیراقێ دێ پرۆژە قانوونا بودجا دو سالان کەتە ئێک، ئەو ژی: ئێک: وەلات تووشی کورتئینانا بودجێ بوویە. دو: پەرلەمانێ عیراقێ ھند دەم ل بەر دەست دا نەمایە کو بشێت گەنگەشێ ل سەر دو پرۆژە قانوونێن گرنگ یێن وەکو بودجێ بکەت”.
ئاشکرا ژی کر کو حوکمەتا عیراقێ وەکو پرۆژە قانوونەکا سەربخۆ بودجا ئەڤ سالە 2014 رەوانەی جڤاتا نوونەرێن عیراقێ ناکەت، بەلکو بودجا 2014 دێ کەتە زانیاریێن حساباتێن دووماھیێ و ب وی رەنگی دێ ھنێرتە پەرلەمانی.
ئەندامێ لیژنا دارایی ل جڤاتا نوونەرێن عیراقێ ئاماژە دا وێ چەندێ ژی کو پرۆژە قانوونا بودجا ئەڤ سالە ل دووڤ پێدڤیێن وەلاتی و ل بەرچاڤگرتنا رەوشا ئەمنی و چەکدارکرنا ھێزێن ئەمنی و رەوشا ئاواران و کەرتێن خزمەتگۆزاری و پەروەردێ ھاتیە دانان و گۆت: “پێشبینی دھێتەکرن پرۆژە قانوون ھەتا ھەیڤا بھێت بگەھیتە جڤاتا نوونەرێن عیراقێ”.