حکومەتا ئیراقێ دگەل بارزانی بۆ دانوستاندنا نەیا راست بوو
دیدار، سالار محەمەد دۆسكی:
سەعید تاهر بەگ، زێدەتر گۆت: خودێ ژێ رازی (جەلال تەلەبانی) ب فەرمانا خودێ ژێ رازی (مەلا مستەفا بارزانی) ببوو ئامر هێز و دووڤ دا بەرپرسێ مەكتەبا سیاسی یا پارتی دیموكراتی كوردستان و (مام جەلال) خیانەتكر و گەهشتە حوكمەتێ و جەنابێ( مەلا مستەفا بارزانی) گەلەك عاجز بوو، دەمێ عاجز بوو كەسەك نەشیا سەحكەتێ یان لگەل باخڤیت.
هێشتا گۆت: پشتی سالا 1975ێ بوومە فەرمانبەرێ رێڤەبەریا ڤەگەهاستنێ وی دەمی (تێلی حەجی) بەرپرسێ دەڤەرێ بوو و هەر شەڤا ئەندامێن رێكخستنێ چالاكیەك كربا دا ل جهەكێ دی هێنە تۆماركرن دا نەهێنە دیاركرن و ئاشكرانەبن، ل سالا 1985ێ چل زڤستانێ دەمژمێر 11ی شەڤێ جارەكێ ئەمنا دهۆك گازیكرم و گوت ڤێت دیار بكەی ئەف رێكخستنێن نهێنی كیشكن، دناڤبەرا سالێن 1984- 1985ێ هەر مالەكێ مرۆڤەكێ نێزیك ب با پێشمەرگە ئەو مال هەمی داهێتە بەرزەكرن و دەرخستن و كەسەكێ نەزانی كیڤەیە، مە نیاسەك هەبوو و ئاگەهداركرم كو سوباهی دورا خێزانا منە و دێ ب شەڤ ژلایێ ئەمنا دهۆك ڤە هێنە بەرزەكرن، وی دەمی كورمن (سالم) فەرمانبەرێ پەروەردێ بوو و هەمان دەم ئەندامێ ئێكەتیا مامۆستان بوو، (عەبدوللا) كورم ژ لەشكەری یا عیراقێ رەڤی یە و هەما هاتە دەستەسەركرن ئێكسەر دێ هێتە سێدارەدان، دڤی ماوەی دا پێنچ گەنجێن دهۆك چونكە ژ لەشكەری یا عیراقێ رەڤی بوون ئینانانە گورەپانا بەرامبەر سوپەرماركێتا مازی یا نوكە و گرێدان و پێشچاڤێن خەلكی گولەبارانكرن و گوتە خودانێن وان پارێ گولا ژی بینن وی دەمی حوكمەتا عیراقێ یا دژوار و ئاریای بوو و هەمی قوتابیێن قوتابخانا و فەرمانبەرێن فەرمانگەهێن حوكمەتێ كوم كربوون و پێش چاڤێن وان گولە بارانكرن.
هێشتا گۆت: مە بریاردا ب دو ترۆمبێلا خوە دەرباز بكەین چونكە كورێ من (عەبدوللا) هارب بوو و ژ لەشكەریێ رەڤی بوو ئەو ل گەل (سالم) ب ترۆمبێلا حوكمی سوار بوو و خێزان و ژن و زارۆك ل گەل من ب ترۆمبێلەكا نورمال سواربوون،گەهشتینە بەرۆشكێ و مەفرەزەكا ئەمنێ هاتبوو دانان وی دەمی كەسەكێ ئەمنێ هەبوو گەلەكێ زوردار بوو و ناڤێ وی (مەئمون) بوو و هەمی ژێ دترسیان و كەسەك ژێ قورتال نەبوو و مە هەمیان دوعادكرن یا خودێ بتنێ ئەف جارە مە قورتال بكە ژ دەستێن ڤی زالمی و ترۆمبێلا مە نێزیكی مەفرزێ بوو و ئێكێ ئەمنێ گازیكرە (مەئمون) و گۆتێ وەرە تێلەفونە و چوو دا تێلەفونێ با خڤیت و ئەم دەربازبووین و ئەگەر ئەو نەچووبا 100% ئەم قورتال نەبووین هەتا گەهشتینە دێرەلوكێ ئەم د 14% زالگەهێن حوكمەتێ را دەربازبووین، زالگەها سەرسنگ ژی پیچەك یا نەخوش بوو و پرسیار ژ كورێ من (سالم) كرن كو فەرمانبەرێ پەروەردێ یە و دیسا ترۆمبێلا پەروەردێ یا حوكمی ڤێ یە لێ خوە قورتالكر هەتا ئەم گەهشتینە دێرەلوكێ، زالگەها دێرەلوكێ ژی دیسا بۆ ترۆمبێلا كورێ من(سالم) كێشە دروستكرن چونكە (عەبدوللا) ناسنامە نەبوو و رەڤی بوو ژ لەشكریێ و ئینانە خوارێ و گۆت كا ناسناما ڤی وی ژی گۆتێ ترۆمبێلا حوكمەتێ یە و فەرمانبەرم دێ ل سەر قوتابخانا گەرم و ترسم بتنێ بهێم من برایێ خوە ل گەل خوە ئینایە و ترۆمبێل پشكنینكر و ژ نشكەكێ ڤە چەند كاغەزێن گرێدایی شەهیدێن عیراقێ ترۆمبێلا دیتن و گەلەك كەیف پێ هات و ژ خواست ئێكێ بدەنێ چونكە خێزان و كەس و كارێن وان شەهید هەیە و (سالم) دانێ و ئێكسەر گۆتێ هەرن و دەربازبوون و ئەژی ل گەل خێزانا خوە دەربازبووم و ئەم كەفتینە چیایی و زڤستانەكا دژوارە وناف بەفرێ و مە پەیوەندی ب لقێ ئێك كر و كورمن (عەبدوللا) بۆ رێڤەبەر و مامۆستایێ قوتابخانا گوندێ مە وی دەمی قوتابخانێن شۆڕەشێ هاتبوونەڤەكرن، (سالم)ێ كورێ من ل ئیرانێ خواند بوو و شارەزایی هەبوو د شووشنا وێنان دا و بزاڤكرن ل گەل كادرێن لقێ ئێك وێنان وەك ستودیو بۆ بشوت و ئێدی پێدڤی ناكەت پێشمەرگە بۆ شووشتنا وێنان بچیتە ئیرانێ و رێكا مان و نەمانێ و ئێكەم وێنەشویا وێنەی ل سالا 1985ێ ل لقێ ئێك كورێ من ڤەكر و مالا مە ل گوندی هاتە نێشتەجێبوون و بتنێ (12) مال ل گوندێ مە بوون.
ناڤبری گۆت: ل سالا 1987ێ ل گەل كورێ خوە (سالم) وی دەمی من دل نەدا بتنێ بچیت و حەفت كیلومەتران كەفتینە ناف ئاخا توركیا دا دەربازبینە ئیرانێ بۆ گەهاندنا پوستەكێ لقێ ئێك بۆ مەكتەبا سیاسی و كورێ من (سالم) یێ بریندار بوو و شەش رۆژا ب پیا چووین و هێزێن توركا ئەم گرتین و شەش هەیڤان ئەز و كورێ خوە ماینە زیندانێن توركان ڤە، ل (بێروخێ) و (شەمزینا) و (گەڤەرێ) و (جولەمێرگێ) و ئەڤە هەمی شەش هەیڤان بەردەوام بوو.
سەعید بەگ تاهر بەگ عەبدوللا بەگ زێدەتر گۆت: ل سالا 1988 ل هەوا ئەنفالان هەمی گوند هاتنە بەردان و بەرەف توركیا چووین و ژ هەمی روویەكی ڤە هێرشێ خەلكێ مەهاتەكرن و خوە ل سەرێ گوندێ(سێفێ) فرۆكێن لەشكشریێن ئیراقێ هاتن و یێ رەمی دكەن و توركیا نەهێلا ئەگەر دا خەلكی هەمیێ كوژن، دایكا من ئەسمیخان (148) سالی بوو و مابوو ل گوندی دا و كورێ من (سالم) بزاڤكرن ڤەگەرنە ڤە و زڤرین دایكا مە قورتالكر و ئەم ل سەرێ (سێڤێ) ماین بۆ ماوێ حەفتیەكێ برسی بن وان تراشا ماین و دووڤ دا برینە كەمپا (گەڤەرێ) وی دەمی كادرێن پارتی ل سەر كەمپێ هاتبوو نە بەلاڤەكرن و سەرپەرشتیكرنا كەمپێ وی دەمی ئێكێ (بێدهی هەبوو بناڤێ عەبدوللا) هاتبوو دەستەسەركرن و برایێن وی و مرۆڤێن وی خوپیشاندان كر و هندەك چوون (ئالایێ) توركا ئینا خوار و میت و لەشكرێ توركا ل گەل قائیمقام و والی هەمی هاتن و كەمپە دورپێچكرن و جەنەرالەكێ توركی ئاخفت و گۆت مە هوون وەك مرۆڤ وەرگرتینە و ئەگەر ئەم قەبوول ناكەین هوون بوهوسەكێ ژی بهێنە ناف ئاخا توركیا دا و ئەگەر ئەف بابەتە دوبارە بوو دێ ئێكسەر دەینە بەر توپان و چەندەك هاتنەگرتن و كورمن (سالم و سەربەرست تروانشی) ژی هاتنە گرتن و هەچیێ بهێتە گرتن ب قوناتاخێن دڤنگ و دار و بەران دهێتە قوتان و (12) هاتنە گرتن و ب ترۆمبێلا ڤەگوهاستن و هەتا ئەمنا گەڤەرێ دژوار قوتان و برنە بن عەردی و قوتان هەتا سپێدێ و ئەم ژێ بێ هیڤی بوون چونكە كارەب و فەلەقدان و جورێن ئەشكەنجەدانێ دانانە بەر ئەڤان (12) و دووماهیێ ڤەگوهاستنە نەخوشخانێ و زڤراندن و دادگەهكرن و شاهد ئنان كو ئەڤان (ئالایێ) توركیا ئینابوو خوار وسێ هەیڤان ل (دیاربكەر) هاتنەزیندانكرن و سا 1991ێ زڤرینە كوردستانێ.
ل دووماهیێ، سەعید بەگ گۆت: داخاز دكەم ئەڤ مرۆڤێن ماندیبوون دیتی نەهێنە ژبیركرن و كورم (27) پێشمەرگاتی و دەربەدەری و برینداری و زیندان و ئەشكەنجەدان دیتی نە و هەتا نوكە هاتینە پشت گوه هاڤێتن و مێرانیا وی كری كەسەكێ نەكریە و دڤێت حەقەك هەبیت و دڤێت رێكەك بۆ بهێتە دیتن.
