حێچاتیا سیاسیا
محه‌مه‌د چه‌لكى
به‌رى هه‌لبژارتن بهێنه ئه‌نجامدان، قه‌وانێ دیمۆكراتیێ و هه‌ڤپه‌ژراندنێ و رێزگرتن ل ده‌نگێ ده‌نگده‌ران و ئه‌نجام ب چ ڕه‌نگى بن، ته‌ڤ مینا خه‌لكێ سوید و ئه‌مریكا دێ په‌ژرینن، ده‌نگێ وى قه‌وانى گوه ل كه‌ڕڕان ژى مسمت كربوون، لێ چاوا ئه‌نجامێن به‌راهیێ ده‌ركه‌فتن، وه‌كو كێچ به‌ربن بن هنگلێن زارۆكه‌كێ سه‌رشویشتى چاوا قۆن توتیك ڤێ ناكه‌ڤت، وه‌سان دیمۆكراتخوازێن كوردستانێ ژى قۆن توتیك ڤێ نه‌كه‌فت و ڕاستیا دیمۆكراتخازیا وان سه‌دباره كرڤه. گه‌له‌ك جاران مامێ عه‌لۆ دگۆت: (من باوه‌رى ب دیمۆكراتخازیا ڤان به‌رویكپه‌رێسێن كوردستانێ نینه)!، ژبه‌ر ڤێ دیدا وى گه‌له‌ك جاران دكه‌فته به‌ر هێرشا ئه‌فه‌ندى و بیڤدۆزان. هنده‌ك ژ وان ئه‌فه‌ندیان ئه‌ڤ دیده ب هشك و دوور ژ ڕاستیا كه‌توارى دهه‌ژمارتن و هنده‌كا ژى دگۆتن: (مامێ عه‌لۆ دخوازت ب ڤێ هشكیا خوه، خوه ل به‌ر چاڤێن ده‌ستهه‌ڵاتێ شرین بكه‌ت و دا ب پۆسته‌كى بهێته خه‌لاتكرن)! هه‌وه ڕاستى بڤێت، خودانێن ڤێ دیدێ هه‌تا ڕاده‌كى ڕاست دبێژن، چونكو هه‌ر كه‌سێ پتر ڕه‌خنه‌كا تۆند (ئه‌ڤجا نه‌گرنگه چه‌ند ڕاستى د وێ ڕه‌خنێ دا هه‌بت) ل ده‌ستهه‌ڵاتێ بكه‌ت، هه‌ما ته دیت ب پۆسته‌كێ بلند هاته خه‌لاتكرن و ده‌ڤێ وى دانانه سه‌رێك. مامێ عه‌لۆ نه ژڤان جوینانه به‌لكو ژ نیشتماپه‌روه‌رى و باشتركرنا ره‌وشا ڤى چرایێ دبێژنێ حوكمه‌تا كوردستانێ یه.
ل چایخانێ چاڤێن مامێ عه‌لۆ ب تێله‌فزیۆنا ب دیواریڤه داله‌قاندى، دزیقبوون و گوهداریا نۆچه‌یان دكر، ل وى ده‌مى ئه‌فه‌ندیه‌كى سلاڤكرێ و گۆت:
ـ ئه‌نجام ب دلێ ته بوون!
+ ئه‌نجامێن چ؟
ـ دیساڤه ته ده‌ستپێكر!
+ ئه‌فه‌ندیێ من مانێ ئه‌نجام هند دزۆڕن، یا ل به‌ر مه به‌رزه‌بووى كانێ به‌حسێ كیش ئه‌نجامان دكه‌ى، وه‌كو ئه‌نجامێن وان لژنێن هه‌تا نوكه ل كوردستانێ بۆ دویفچوونا كه‌یسێن: گه‌نده‌لیێ، مافێ مرۆڤى، داهاتێ ناڤخوه و گومركان، زێده‌گاڤیان ل سه‌ر عه‌رد و مالێ گشتى، كوشتنا ژنان و … كانێ چ هاتیه شكه‌فا وه‌ڵاتیان! ئه‌ڤجا زه‌حمه‌ت نه‌بت مه‌ره‌ما ته پێ چییه؟
ـ ئه‌نجامێن هه‌لبژارتنانێن په‌رله‌مانێ كوردستانێ!
+ دێ وه‌بێژه هه‌ى مالئاڤا!
ـ ئێێێێێێ!
+ مخابن رویێ دیمۆكراتخازیا مه بۆ جیهانێ دیاربوو!
ـ ئانكو ئه‌نجام بدلێ ته بوون!
+ بدلێ من بت یان نه‌ْ ما دێ چ ژ ره‌وشێ گوهۆڕت، یا گرنگ ئه‌وه مه هه‌تكا خوه بر، خوه‌زى هه‌ما هه‌ر نه‌هاتبا كرن!
ـ بۆ چى ما دیمۆكراتى نه هه‌لبژارتن و فره پارتیاتیه؟
+ به‌لێ ..
ـ ڤێجا بۆچى مه هه‌تكا خوه بر؟!
+ ئه‌ز دخازم تشته‌كى بۆ ته بێژم: دیمۆكراتى نه تنێ هه‌لبژارتن و فره پارتیاتییه به‌لكو باوه‌رى پێكرن و پێگیرى ب ئه‌نجامانه، ئه‌ڤجا چه‌ند ئه‌نجام نه ل به‌ۆژه‌وه‌ندا ته‌بن دڤێت بێى هێرڤه و وێڤه پێگیریێ پێ بكه‌ى، مێزه‌ى پرێزا پارتیێن كوردستانێ بكه دێ بۆ ته دیاربت كانێ ئه‌م ل كیش ئاستێ دیموكراتیێ نه!
ـ ئێ ئه‌ڤه ژى پشكه‌كه ژ دیمه‌وكراتیێ!
+ ئه‌ز ب ئه‌نیا خانیێ مه‌زن دكه‌م ئه‌ڤه حێچاتیا هنده‌ك سیاسیا و پارتیێن كوردستانانێ یه!
ـ ڤێجا حێچاتى چیه؟
+ ڤێ پرسیارێ ژ مامۆستا حه‌جى جه‌عفه‌رى* بكه؟
* زمانزان و نڤیسه‌ره‌كێ هێژایه.
