حەجی رێكانی دێ پشكداریێ د قارەمانییا ئەمریكا یا نێڤدەولەتی دا كەت
مەحمود نهێلی:
حەجی عەبدولسلام یێ بەرنیاس ب حەجی رێكانی قارەمانێ كوردستانێ یێ یارییا لەشجوانیێ بو رۆژناما ئەڤرۆ دیاركر وی پرۆ كارتا نێڤدەولەتی پیشەكار ل سەر ئاستێ جیهانێ د دووماهیی قارەمانی دا ب دەستڤە ئینایە و گۆت: هەر كەسەكی ئەڤ كارتە نەبیت نەشێت پشكداریێ د هەمی قارەمانیێن جیهانی دا بكەت، من ل بەرە پشكداریێ د قارەمانیەكا ئەمریكا دا بكەم.
هەروەسان ناڤهاتی دیاركر بۆ ماوەكێ درێژە بەرهەڤییان دكەت ددەمەكێ نێزیك دا دێ خشتە و ژڤانێ قارەمانیێ هێتە بەلاڤكرن و گۆت: بەرهەڤیێن من بۆ قارەمانیەكا هوسا گەلەك ب زەحمەتن ئانكو دڤێت ئەم باش خوە بەرهەڤ بكەین بو وێ یەكێ سەرێ خوە و مللەتێ خوە ل وێ قارەمانیێ بلند بكەین و ئارمانجا من د ڤێ قارەمانیێ دا ئەوە پەیاما كوردستانێ بگەهینمە جیهانێ كو مە ژی كەسانێن وەرزشڤان و خودان شیانە هەنە ل سەر ئاستێ جیهانی، یا د شیان دا بیت بۆ ناڤێ كوردستانێ دێ كەم و ئالایێ كوردستانێ ل هەمی جیهانێ بلند بكەم ب رێكا ڤێ وەرزشێ.
ژلایەكێ دووڤە ناڤهاتی گۆت: رۆژنامەیا هەوە ئێكەم دەزگەهێ راگەهاندنێ یە ئەز ل سەر ڤێ قارەمانیێ بو د ئاخڤم، دیسان بو هەر قارەمانیەكا بەری نوكە جەنابێ مەسرۆر بارزانی برایێ گەورە و سەرۆك وەزیران و هەروەسا پارێزگارێ دهوكێ گەلەك هاریكاریا من كریە و پشتەڤان بووینە دگەل من دا.
دەربارەی ئاستێ ڤێ وەرزشێ ل كوردستانێ ناڤهاتی دیاركر ئاستێ یاریزانێن كورد ل سەر ئاستێ ئیراقێ نەیێ باشە و گەلەك د كێمن و قارەمانیێن كوردستانێ ژی بو هەیاما چەندین سالایە گەلەك د لاوازن و گۆت: ل ڤێ دووماهیێ ئیراق گەلەك یا پێشكەفتی، من دو سالان دگەل هەلبژارتیێ ئیراقێ پشكداری كریە و شیام باشترین دەستكەفت ب دەستخوەڤە و شیایمە قارەمانیا ئاسیا ب دەستخوە ڤەبینم.
ل دووماهیێ حەجی رێكانی گۆت: مە هندەك پێنگاڤ هاڤێژتینە و پلان داناینە كو ئەم ڤێ یاریێ ل كوردستانێ پێشبێخین، ژبەركو نوكە ل كوردستانێ هولێن لەشجوانیێ زۆر هەنە و یاریزان ژی گەلەكن لێ نە ل وی ئاستی نە كو بشێن ناسناڤان ل سەر ئاستێ ئیراقێ ب دەستخوەڤە بینن.
