حەجی سالحێ سەعەتچی
ب: شاكر ئەتروشی
كەسایەتیێ جامێر و خێرخواز، خودێ ژێ ڕازی (حەجی سالح یەحیا زێوەیی) كو ب (حەجی سالحێ سەعەتچی) یێ بەرنیاسە، ئێك ژ كەسایەتیێن ناڤدارێن دهۆكێ یە و دهێتە هژمارتن ئێكەم كەس دكانا فرۆتنا دەمژمێران، بەری (66) سالان ب ناڤێ (جیهانا دەمژمێران) ل دهۆكێ ڤەكری و نوكە ژی یا مای و كوڕێ وی (نزار) سەرپەرشتیا وێ دكانێ دكەت.
حەجی سالحێ سەعەتچی، خەلكێ كوندێ زێوا شەفیق ئاغایە و ژ دایكبوویێ سالا (1932) بوو، د ژیەكێ بچووك دا حەزژ چێكرنا دەمژمێران دكر، كو ل وی دەمی هندەك هەڤالێن وی ژی سەعەتچی بوون، ژوانا خودێ ژێ رازیان (مەلا محەمەدێ سەعەتچی و مەلا تاها كۆڤلی و مەلا عەبدولكەریم ئەلندكی) لەورا پشتی دەلیڤەیا خۆ دیتێ ل سالا (1960) دكانا جیهانا دەمژمێران ل سەنتەرێ باژێرێ دهۆكێ ڤەكر، هەروەسا ل سالا 1966 هەتا 1975 زێدەباری بازرگانیا دەمژمێران، كارێ كڕین و فرۆتنا زێڕی ژی دكر، لێ پشتی 1975 بتنێ كارێ بازرگانیا دەمژمێران دكر، ناڤبری ل سالا 1959 ژیانا هەڤژینیێ پێك ئینابوو، بابێ سێ كوڕ و چار كچان بوو، دژیێ (92) سالیێ دا ل دهۆكێ چوویە بەردلۆڤانیا خودێ.
