حەزا مانێ بۆ ماوەکێ دریژ ھەیە
ئەڤرۆ نیوز:
راھێنەرێ یانا ئەتلەتیکو مەدرید یا ئسپانی د بەرھەڤیێ دایە کو ھەڤبەستا خوە ل گەل یانێ نوو بکەت و بو ماوەکێ زێدەتر بمینتە ل ڤێ یانێ و ھەروەسا راھێنەرێ ئەرژەنتینی دیگو سیمیونی دوپاتکریە ل دەمەکێ نێزیک دێ ل گەل بەرپرسێن یانێ کومبیت ژبو دانوستاندنا ڤی بابەتی.
زێدەتر ل دور ڤی بابەتی راھێنەرێ ئەرژەنتینی ئاشکرا کر ل دەمێ نان خوارنێ ل دور ڤی بابەتی باسی نووکرنا ھەڤبەستێ ل گەل ئەنخل جیل شیرەتکارێ یانێ کریە لێ بابەت ب فەرمی نەھاتیە باسکرن و ھزرا ڤێ ژلایێ ناڤھاتی بو ھاتیە پێشکێشکرن و پێشبینی دکەت ل ماوێ بھێت ئەڤ بابەتە ب فەرمی بکەڤیتە بەر دانوستاندنا ل گەل بەرپرسێن یانێ.
ل دووماھیێ ناڤھاتی ئاماژەکر ئەو نوکە د رەوشەکا باش دایە و وی شیانێن زێدەتر ژ یێن نوکە یێن ھەین و ئارمانجا وی یا سەرەکی ئەوە ھژمارەکا ناسناڤان ب دەستڤە ببەت کو بەریا نوکە یانێ نەبرینە.
دھێتە زانین سیمیونی پشتی ئەرکێ راھێنەریا یانا ئەتلەتیکو مەدرید وەرگرتی و ھەتا نوکە حەفت ناسناڤ برینە خولا ئوروپی دو جاران و دیسان دو جاران کاسا سوپەرا ئوروپی و جارەکێ ھەر ئێک ژ خول و کاسا ئسپانیا و کاسا سوپەرا ئسپانی.
