حەزژێکرن پشتی هەڤژینیێ دبیتە ڕێزگرتن و باوەری
زاخۆ، دلۆڤان هالۆ:
ڕاوێژکارەکا هەڤژینیێ د دیدارەکێ دا بۆ ڕۆژنامەیا ئەڤرۆ دیار کر کو هەڤژینی وەکو گولێ یە بدەستڤەئینانا وێ بتنێ نە یا گرنگە، بەلکو دڤێت مرۆڤ بزانیت چاوا وێ گولێ بهێلیتە گەش و نەچرمسیت و گرنگیێ پێ بدەت و گۆت؛ گرنگیپێدانێ ژی چ پارە لێ ناهێته مەزاختن.
دەروونناس و ڕاوێژکارا هەڤژینیێ، مەهناز قوبادی دیار کر کو پشتی ماوەیەکێ ژ پێكئینانا ژیانا هەڤژینیێ هندەك ژن و زەلام هەست ب وێ چەندێ دکەن کو ئێدی ئەو ڤیان و حەزژێکرنا بەری هەڤژینیێ د ناڤبەرا وان دا نەمایە و دلێ وان ژ ئێك سار بوویە و گۆت؛ ئەڤ چەندە ژی یا دوورە ژ ڕاستیێ، گازندەیا زۆربەیا ژن و زەلامان ئەوە دبێژن هەڤژینێ من یان هەڤژینا من گرنگیێ ب من نادەت و حەزژێکرنا خۆ بۆ من نا دەربڕیت و پەیڤێن حەزژێکرنێ نابێژیته من.
مەهنازێ، ئاماژە ب وێ چەندێ ژی کر کو ڕاسته پشتی پێکئینانا ژیانا هەڤژینیێ هێدی هێدی ئەو حەزژێکرنا بەری هینگێ پیر دبیت لێ ژناڤ ناچیت و گۆت؛ ل شوینا حەزژێکرنێ دبیتە ڕێز و حورمەت و باوەری و دهەڤدوو گەهشتن.
دەروونناس مەهناز قوبادی گۆتژی؛ پشتی هەڤژینیێ ئەرکێ زەلامان زێدەتر دبیت، ل دەمێ ژنەك دچیته د ژیانا زەلامی دا ئەو ژنە چاڤەرێی گەلەك تشتایە ژ زەلامێ خۆ، لێ ئەگەر ئەو تشتە بۆ نەهاتنە کرن ژن هەست ب وێ چەندێ دکەت کو هەڤپشکێ ژیانا خۆ ب شاشی هەلبژارتیە و نە ئەو کەسە بوو یێ وێ ئەڤ هزرە بۆ دکرن.
دەروونناسێ د بەردەوامیا ئاخفتنێن خۆدا گۆت؛ هەڤژینی وەکو گولێ یە بدەستڤەئینانا وێ بتنێ نە یا گرنگە بەلکو دڤێت مرۆڤ بزانیت چاوا وێ گولێ بهێلیتە گەش و نە چرمسیت، لەورا دڤێت ژن و زەلام پێکولان بکەن ب دەربڕینا هەست و سۆزێن خۆ و گۆت؛ حەزژێکرنا خۆ بەردەوام بهێلنە ساخ، ڤێ چەندێ ژی چ پارە لێ ناهێته مەزاختن چونکی دەربڕینا حەزژێکرن و ڕێز و حورمەت و گرنگیپێدانێ بێ بەرامبەرە”.