حەز دكەین گرۆپەكێ تایبەت بۆ كچێن شانۆڤان ل دهۆكێ هەبیت
شاكر ئەتروشی:
شانۆڤان (ئیخلاس عەبدوللا عومەر) د دیدارەكێ دا بۆ رۆژناما ئەڤرۆ گۆت: دژیەكێ بچووكدا حەزا كارێ هونەری ل دەف من هەبوو، لەورا دەمێ من پولا نەهێ بنەرەت ب دووماهی ئینای ئەز چوومە پەیمانگەها هونەرێن جوان و من دڤیا ل پشكا شێوەكاری بخوینم، لێ ژبەر ژیێ من ئەو پشك پێ نەبوو ئەز برمە پشكا شانۆیێ و دەستپێكا منا هونەری ل ڤێرە دەستپێكر كو ئەو ژی ل سالا 2007 بوو، پشتی سالەكێ وەك ئەكتەر من پشكداری د شانۆگەریا (مژا ل هزر و هەستا) كر، كو ئەڤە دهێتە هژمارتن كارێ من یێ ئێكێ و نوكە مژوولی شانۆگەریەكا دی نە، دیسان وەك ئەكتەر دێ پشكداربم و هیڤیا من ئەوە بشێم خزمەتا شانۆیێ ل دەڤەرا ل هەرێما كوردستانێ بگشتی و دەڤەرا بەهدینان ب تایبەتی بكەم.
هەروەسا گۆت: پشتی دەرچوونا من ژ پەیمانگەها هونەرێن جوان ئەز چوومە پشكا درامایێ ل كولیژا ئادابێ ل زانكۆیا دهۆك من ئەو ژی ب دووماهی ئینا و هیڤیا من ژ جهێن شۆلەژێ ئەوە پتر گرنگیێ ب شانۆیێ و بدەن و هەكە ڤیستەڤالەكا شانۆیێ ل دهۆكێ هەبا دا گەلەك یا باش بیت، هەروەسا گرۆپەكێ تایبەت بۆ كچێن شانۆڤان هەبا دا بیتە مالا وان، چنكو مە گەلەك كچێن شانۆكار هەنە پشتی دەرچوونێ چ جه نینن بەردەوامیێ ب كارێ خوە بدەن و هەكە ئەڤ گرۆپە هەبە دا شانۆگەریێن باشتر هێنە نیشادان.
