حەز ژ سترانێن بلەز و مۆزیكا كلاسیك دكەت
سندس سالح سلێڤانەیی:
سترانبێژ (مێڤان سالح) كو دبیتە كوڕێ هونەرمەند (سالح ئامێدی) د دیدارەكێ دا بۆ رۆژنامەیا ئەڤرۆ گۆت: ژبەركو بابێ من سترانبێژ بوو، دژیەكێ بچووكدا ئەز ل دیوانا وی دروونشتم و من گوهداریا سترانێن وی دكر و پشتی ماوەیەكی من ژی هەستپێكر كو ئەڤە شیانە، ئانكو شیانێن سترانگۆتنێ یێن ل دەف من هەین و ئێدی ب هاریكاری و پشتەڤانیا بابێ خوە من ژی دەستپێكر و هیڤیا من ئەوە ل دووف شیانێن خوە ئەز ژی بشێم هەتا رادەیەكی خزمەتا ستران و مۆزیكا كوردی بكەم.
هەروەسا گۆت: ل سالا (1999) ل باژێرێ مووسل ب من سترانا خوە یا ئێكێ ب ناڤێ (پەشیمانی) تۆماركر، كو ژ بەرهەمێ كەنالێ كوردستان یێ ئەسمانی بوو، وێ سترانێ هەتا رادەیەكێ باش دەنگڤەدا ئەز پێ بەرنیاس بووم، بۆ زانین ئەز گەلەك گوهداریا سترانێن هەردو هونەرمەندێن مەزن (محەمەد عارفێ جزیری و تەحسین تاهای) دكەم، هەروەسا گوهداریا سترانێن هونەرمەندان (ئیبراهیم تاتلیس و كازم ئەلساهری و سەعەد ئەلبەیاتی) ژی دكەم، هەروەسا حەزژ سترانێن بلەز و مۆزیكا كلاسیك دكەم، هەروەسا هیڤیا من ژ دامودەزگەهێن هونەری ب تایبەت ژی رێڤەبەریا رەوشەنبیری و هونەری و سەندیكا هونەرمەندان ئەوە ژ نوكە وێڤە پترچاڤێ خوە بدەنە هونەرمەندان دا ئەو ژی بشێن بەرهەمێن باشتر تۆماربكەن، هەروەسا ژ وەزارەتا رەوشەنبیری دهێتە خواستن بۆ سالا بهێت پلانەكا باشتر بۆ پشتەڤانیكرنا هونەرمەندان دانن و ئەوێن زیرەك و بەرهەمدار پتر گرنگیێ پێ بدەن.
