حەز ژ گرتنا وێنەیێن سروشتی دكەت
زنار تۆڤی
وێنەگر (رەحمی ئیینچ) كوخەلكێ باژێرێ گەڤەرێ یە ل باكورێ كوردستانێ، د دیدارەكێ دا بۆ رۆژنامەیا ئەڤرۆ دیاركر كو ئەو مامۆستایە و ئەڤە (15) سالن كارێ وێنەگریێ ژی دكەت وێنەیێن سرۆشتی یێن دەڤەرێن جۆلەمێرگێ و گەڤەرێ و جهێن دی یێن كوردستانێ دگریت و ئەڤە پێنج سالن وێنە و ڤیدیۆیێن دگریت بەلاڤ دكەت.
ناڤهاتی گۆت: ئەز گەلەك حەز ژ سەقایێ گوندان و گرتنا وێنەیێن سرۆشتی دكەم، هەروەسا ئەز مامۆستایێ وەرزشێ مە و ئەو رۆژێن دەوام نەبن دچمە دناڤا سرۆشتی دا و وێنەیان دگرم و حەز ژ كلتوورێ كوردی دكەم، گەلەك جاران ئەو وێنەیێن گرێدایی ب ژیانا مە كوردان ڤە بەلاڤ دكەم، ئەز دیمەنێن گەلی و نهالا و سیلاڤا و چوونا كڤاركان و ئینانا گیایی و چلی ل سەر بەفرێ دگرم و هەتا نوكە ئەز شیایمە رێژەكا مەزن یا وێنە و ڤیدیۆیان بگرم و بەلاڤ بكەم.
