حەسەن عەلی خەنجەر: زەوقێ من ل سەر ھونەری نەمایە
دھۆک، شاکر ئەتروشی:
ھونەرمەندێ پێشمەرگە و زیندانیێ سیاسی (حەسەن عەلی خەنجەر) د دیدارەکا تایبەت دا ل مالا خوە ل قەسرۆکێ بۆ رۆژناما ئەڤرۆ گۆت: نێزیکی سالەکێ یە وەکو ھونەر من یێ ھێلای و زەوقێ من ل سەر ھونەری ژی نەمایە، ل بەس بەری چەند رۆژان ل تەلەفزیۆنێ داخواز ژمن کرن من ژی دلێ وان نەھێلا و نوکە ژی رۆژناما ئەڤرۆ یا ل مالا من مێڤانە سەر خاترا وان من بەندەک گۆت و ئەگەرێن ھێلانێ من نشتەرگەریا دلی کری یە و وەکو بەرێ ژی زەوق نەمایە، برایێ من رەمەزان ستران دگۆتن نوکە ئەوژی یێ نەخۆشە نابێژیت، بەس برازایێ من (کۆچەر خەنجەر) ئەو سترانان دبێژیت.
حەسەن عەلی خەنجەر، کو ئەڤە نێزیکی شێست سالانە سترانان ب تایبەت یێن فولکلۆری دبێژیت: ئەز نەیێ پەشیمانم کو من ستران گۆتین، چنکو دوەختێ خوە دا ئەز دچوومە داوەتان و ژیارا من ل سەر تەمبیر و کەمانچێ و سترانگۆتنێ بوو، چنکو ل وی دەمی مە چو مووچە نەبوون، دیسان ئەز نەیێ پەشیمانم چنکو نوکە ل ھەر چار پارچێن کوردستانێ و ھەر وەلاتەکی کورد لێ ھەبن من دنیاسن، دەربارەی گێڕانا فیستەڤالەکا رێزگرتنێ بۆ من یان چێکرنا پەیکەرەکێ من کو ب ساخیا خوە ئەز ببینم خوە ئەز نابێژمە وان چێکەن، بەس ھەکە بۆمە چێکرن ئەم دێ سوپاسیا وان کەین، بەس دو جاران سترانبێژێ مللی عابد دھۆکی دەمێ سەرۆکێ تیپا داسنیا یا فولکلۆری دو ئێڤاریێن رێزلێنانێ ئێک ل دھۆک یا دی ل بەردەرەش بۆمە کربوون، ھەروەسا ل شێخان ژی رێز ل مە ھاتبوو گرتن.
ل دووماھیێ گۆت: نوکە ژی ئەز پێشمەرگەمە و من پلا (عەمید) ل فەرماندا دھۆک ھەیە و پشتی مرنێ ژی من چو وەسیەت نینن بێژم، بتنێ ھیڤیا من ئەوە دەولەتا کوردی بھێتە راگەھاندن و مللەتێ کورد ل ھەر چار پارچێن کوردستانێ ھەڤدۆ بگرن.
