حەشدا شەعبی خوە ژ بڕیارا ئەمریكا بۆ راگرتنا خەرجكرنا مووچەیێ چەكدارێن خوە ڤەددزیت
سیاسەتمەدارەكێ ئیراقێ ئاشكراكر، حەشدا شەعبی خوە ژ بڕیارا ئەمریكا بۆ راگرتنا خەرجكرنا مووچەیێن چەكدارێن حەشدا شەعبی ڤەددزیت و فێلان دكەت.
ئەحمەد ئەبیز، سیاسەتمەدارێ ئیراقی كو هەڤدەم هەلگرێ رەگەزنامەیا ئەمریكی و ئیرانی ژی یە، ل پێگەهێ خوە یێ تایبەت ل تۆرا جڤاكییا ئێكس بەلاڤكر» دەستەیا حەشدا شەعبی خوە ژ بڕیارا ئەمریكا بۆ راگرتنا خەرجكرنا مووچەیێ چەكدارێن حەشدا شەعبی ڤەددزیت و فێلان دكەت، بەلكو رادگەهینیت كو ل جهێ (كی كارد) ێ، كارتەكا ئەلكترۆنی یا دی ب ناڤێ (ئەلموهەندس) بۆ خەرجكرنا مووچەی بكاردئینیت».
ئەڤە د دەمەكیدایە كو بۆ مووچەیێ مەها خزیرانێ یا چەكدارێن حەشدا شەعبی، هەرچەندە وەزارەتا داراییا ئیراقێ ئەو مووچە خەركر، بەلێ ژ ئەگەرێ ڤەكێشانا كۆمپانییا (كی كارد) ژ پیدانا مووچەی ب میلیشیا، چەند حەفتییەكان كێشە دروست بوو و دشیاندا نەبوو مووچە بهێتە دان، بەلێ پاشی كێشە ب دانانا كارتەكا ئەلكترۆنی یا نوو هاتە بێ دەنگكرن.
هەرچەندە وی دەمی دەستەیا حەشدا شەعبی بەیاننامەیەك بەلاڤكر و ئەو كێشە ب (تەكنیكی) هەژمارت، بەلێ سەركردەیێن حەشدا شەعبی، وی دەمی راگەهاند كو كێشە ژ ئەگەرێ فشارا ئەمریكا دروست بوویە.
د ڤی چارچۆڤەیدا مەیسەم ئەلزەیدی، فەرماندەیێ فیرقەیا عباس یا حەشدا شەعبی راگەهاند، ل بن فشارا بەنكا فیدرالی یان وەزارەتا گەنجینەیا ئەمریكا، كۆمپانییا تایبەت ب دابینكرنا مووچەیێ چەكدارێن حەشدا شەعبی (كی كارد) خوە ژ بەلاڤكرنا مووچەیێ حەشدا شەعبی ڤەكێشا.
ژ ئالیێ خوەڤە، ستیڤن نەبیل، چالاكڤانێ سیاسی و رۆژنامەڤانێ ئیراقی، ل پێگەهێ خوە یێ تایبەت ل تۆرا جڤاكییا فەیسبووكی بەلاڤكر» دەستەیا حەشدا شەعبی تووشی كێشەیا ئیداری بوویە، پشتی فشارێن گەنجینەیا ئەمریكا ل سەر بەنكان».
ستیڤنی ئەوژی ئاشكراكر كو ئەمریكا نەراستەوخوە ئاماژە ب وێ چەندێ كریە كو ل حالەتێ بەردەوامبوونا خەرجكرنا مووچەی، دێ بەنك روو ب روویێ سزایان كەت.
ب دیتنا چاڤدێرێن سیاسی كو ئەڤ فشارا ئەمریكا بۆ وێ چەندێیە ژێدەرێ پارەداركرنا میلیشیێن سەر ب (بەرەیێ موقاوەمێ) د ناڤ حەشدا شەعبی دا بهێتە هشككرن.
