حەشدا شەعبی پێدڤی ب یاسایێ نینە
عەمەر هەرگۆشی
حەشدا شەعبی درەنگ تێگەهشت كو پێدڤیە یاسا یا وێ ل پەرلەمانی دەربچیت و ب رەنگەكی یاسایی ل كار و چالاكیێن خۆ بەردەوام بیت، دیارە ئەو داخوازە ژی ژ بۆ هندێیە دا ل بن پەردا یاسایێ درێژی ب كریارێن خۆ یێن دژەیاسا بدەن و ل سیاسەتا خۆسەپاندن و خۆ پڕچەككرنێ و هەڕەشەكرنا دەسەلاتێ و گەلێ كوردستانێ بەردەوام بن و بەرژەوەندیێن رەوا و هەژی یێن ئیراقی.
حەشدا شەعبی وەكی هێزەكا رێكخراوەیی ل دەرڤەی یاسایێ چو جاران ب گرنگ نەزانییە ل دویڤ دەستووری و یاسایێ سەردەریێ ل گەل لایەنێن دی بكەت و هەمی جاران ب زمانێ هەڕەشە بۆ سەپاندنا مەرجێن خۆ بكاردئینیت و ژبلی هندێ كو گرفتێن مەزن بۆ دەسهەلاتێ و پێكهاتەیا سوننە و گەلێ كوردستانێ چێدكەت یا بوویە بەلایەكا مەزن ژی بۆ پێكهاتەیا شیعە كو سەروچاڤێن وێ ژی ئەو پێكهاتەیا شیعەیە، وەكو دیارە حەشدا شەعبی یا بوویە بارگرانیەك و بەلایەك بۆ هەمی ئیراقیان و ئەگەرێ سەرەكی یێ ئالۆزیایە ل ناڤ ئیراقێ دا، هندە گرۆپێن د ناڤ حەشدا شەعبی دا كو ب گرۆپێن تیرۆرستی ژ لایێ ئەمریكیا و هێزێن هەڤپەیمان دهێنە ناسكرن و ئەمریكا ب ئاشكەرا دبێژیت كو دەستێ هندەك ژڤانان ب خوینا ئەمریكا سۆرە و رێكێ نادەن كو ئەو گرۆپانە ل گەل جڤاكا ئیراقی تێكەل ببن و ب هیچ رەنگەكی نابیت هیچ یاسایەك رێكێ بدەتە وان كو د كار و چالاكیێن خۆ دا د بەردەوام بن و مەرامێن خۆ یێن گومانا وی بئیننە جی. ئەمریكا خۆیا دكەت ئەگەر حەشدا شەعبی ل گەل دامەزراوەیێن ئیراقی تێكهەل ببیت، دێ تەڤایا دامەزراوێن ئیراقی كەڤنە بن گومان و ئێدی جهێ باوەریا ئیراقییان و ئەمریكییان نامینینت.
جهێ داخێ یە كو حەشدا شەعبی كاریە جهێ خۆ ل ئیراقێ ب هێزبێخیت و ب دارێ زۆرێ بریارێن خۆ ل سەر ئیراقییان و حوكمەتا ئیراقێدا ب سەپینیت وهەتا ئاستەكی بشێت بریارێن كو نە د بەرژەوەندیا گەلێ ئیراقێ دا بن ل پەرلەمانێ ئیراقێ د بەرژەوەندایا خۆ دا بسەپینیت و چاڤان ب بەرژەوەندی بزانیت وەسا ئیراقێ ل دویڤ مەرەما خۆ بهاژۆت.
ئەڤ بێسەروبەریە و ئەو كارەساتێن ب سەرێ ئیراقیان دهێن هەمی ئەنجامێن هندێنە كو ئیراقی ل سەر هیچ بەرنامەكی نیشتمانی و نەتەوەیی ئێكگرتی و تفاق نینە و دەستێ بیانیان پتر دكەڤیتە د ناڤ كاروبارێن ئیراقێ دا و پتر بەرژەوندیێن بیانی دهێن پاراستن ل بەرژەوەندیێن ئیراقی.
حەشدا شەعبی ب خۆ ژی ئاشكەرا دكەت كو تەڤیا ئیراق ل دویڤ مەرەم و حەزێن وان برێڤەبچیت و ئەو مەیدانێ بۆ كەسێ چۆل ناكەن و هەرەشەیێن راستەوخۆ و كاریگەر دكەنە سەر حوكمەتا سۆدانی و دڤێت حوكمەتا سۆدانی و هەمی لایەنێن ئیراقی وازێ ل دیموكراتیەتا خۆ بینن و ل دویڤ فەرمانێن وان بزاڤان بكەن و ئیراقەكێ بنیات بینن كو بۆ جیرانان بكەنە بەهەشت و بۆ ئیراقیا جەهنەم.