حەشدا شەعبی چەندین گوندێن شنگالێ داگیر کرینە

ئەڤرۆ نیوز:
حەشدا شەعبی ل چەندین دەڤەرێن سەر ب قەزا شنگالێ پێشڤەچوونکریە و ھژمارەک گوندێن خاکا کوردستانێ داگیرکرینە یێن دکەڤنە سنورێ ناحیا قەیرەوان یا گرێدایی شنگال، ئەندامەکێ پەرلەمانێ کوردستانێ ژی دبێژیت، مەترسی ھەیە پشتی گرتنا مووسل و شەڕێ داعش شەڕ بکەڤیتە ناڤبەرا ھێزێن پێشمەرگەیێن کوردستانێ و چەکدارێن حەشدا شەعبی، قایمقامێ شنگالێ ژی دیار کر، سەرکردایەتی و حوکمەتا ھەرێمێ ھاتینە ئاگەھدارکرن ژوان رەفتارێن حەشدا شەعبی ل شنگالێ دکەت.
عەبدولڕەحمان فارس، ئەندامێ لیژنا دەڤەرێن کوردستانی لپەرلەمانێ کوردستانێ بۆ رۆژناما ئەڤرۆ گۆت: نابیت ب چو شێوەیەکی حەشدا شەعبی بھێتە سەر خاکا کوردستانێ و دەڤەرێن کوردستانیێن دەرڤەی ئیدارەیا حوکمەتا ھەرێما کوردستانێ، ھەتا نابیت بھێتە چو دەڤەرەکێ ھەکە پێشمەرگە تێدا جێھگیر ببیت و بکەڤیتە سنورێ مادێ 140 یێ دستوورێ عێراقێ، مخابن چەند رۆژەکە حەشدا شەعبی پێشڤەچوونا دکەت ل سنورێ شنگالێ و بەغداژی یا بێدەنگە ھەمبەر ئەڤان رەفتارێن حەشدا شەعبی، پێدڤیە ھێزو لایەنێن سیاسیێن ھەرێما کوردستانێ ئێک ھەلویست ھەمبەر حەشدا شەعبی ھەبیت، چونکە ھەلویستێ حەشدا شەعبی یێ خویایە ھەمبەر کوردا و ھەرێما کوردستانێ، راستە حەشدا شەعبی ل چەند گروپەکێن جودا پێکھاتیە بەلێ ھەموویان ئێک ھەلویست ھەمبەر ھەرێما کوردستانێ یە و مخابن ھەلویستێ وان یێ باش نینە، مە ل سالێن بۆری ئەزموون دگەل چەکدارێن حەشدا شەعبی ھەیە و ل خورماتوو کەرکووک و خانەقین حەشدا شەعبی چەندین ئالۆزی پەیداکرینە و رەفتارێن نەھەژی دکەن، ئەز وەسا دبینم ئەگەر شەڕێ داعش دوماھی بھێت و مووسل بھێتە کۆنتڕۆلکرن حەشدا شەعبی دێ ئاریشەیا بۆ دەڤەرێن کوردستانێ چێکەت و دوور نابینم شەڕ بکەڤیتە ناڤبەرا ھێزێن پێشمەرگە و چەکدارێن حەشدا شەعبی.
ژلایێ خۆڤەژی مەحما خەلیل، قایمقامێ شنگالێ بۆ رۆژنا ما ئەڤرۆ دیارکر” مخابن چەند رۆژەکە ل سنورێ ناحیا قەیرەوان حەشدا شەعبی بەرەف گوندێن کوردێن ئێزدی و تل قەسەف و تل بەنات و کۆجو پێشڤە دھێت و ھاتینە سنورێ شنگالێ، ئەم ل ھاتنا حەشدا شەعبی نەھاتینە ئاگەھدارکرن و چو ھەماھەنگی دگەل ئیدارەیا شنگالێ نینە، راستە ئاکنجیێن ناحیا قەیرەوان ھەموو عەرەبن و پتریا وان دگەل داعش بووینە و دەستھەبویە ل کارەساتا بسەر کوردێن ئێزدی ھاتی، بەلێ نابیت حەشدا شەعبی بھێتە دەڤەرێ و رەوشێ ئالۆز بکەت، ژلایەکێ دیڤە بەری نوکە ھێزێن پێشمەرگەی دگەل حەشدا شەعبی رێکەفتن ھەبویە کو دڤێت سوپایێ عێراقێ بچیتە ناڤا سەنتەرێ ناحیا قەیرەوان و حەشدا شەعبی و پێشمەرگە ھێرشێ نەکەن ھەتا فەرماندێن پێشمەرگە و یێن حەشدێ لگوندێ سینو کۆمبوونەک رێڤەبر و دوڤدا چەندین کۆمبوون ھاتینەکرن، بەلێ حەشدا شەعبی پێگیری رێکەفتنا دگەل پێشمەرگەی نەبو، لدۆر ھێرشێن حەشدا شەعبی ب نڤیسارا فەرمی مە ھەرێما کوردستانێ و حوکمەت ئاگەھدارکرینە.

کۆمێنتا تە