حەفتیا بھێت گازا سپى ل سەنتەرێن باژێران دێ ھێتە بەلاڤەکرن
ئەڤرۆ نیوز، ھوگر محەمەد تاھر:
ل سنورێ پارێزگەھا دھۆکێ ھەتا نوکە نێزیکی 69 ھزار خێزانان گازا سپی وەرگرتیە ئەو ژی ل دەڤەرێن جودا یێن پارێزگەھا تایبەت دەڤەرێن چیای.
زێدەتر ل دۆر ڤی بابەتی ماجد سەید سالح نوونەرێ پارێزگارێ دھۆکێ بۆ کاروبارێن سوتەمەنیێ بۆ ئەڤرۆ نیوز دیارکر كو نها رۆژانە نێزیکی 500 ھزار لێترێن گازا سپی ژ بەغدا دھێنە ھەرێما کوردستانێ و ژ ڤێ رێژێ نێزیکی 100 ھزار لێتران بەھرا پارێزگەھا دھۆکێ نە و ل سنورێ قەزا ئامێدیێ ب سەنتەرێ قەزایێ ڤە گازا سپی یا لێ ھاتیە بەلاڤکرن و دیسا ل پرانیا دەڤەرێن چیای ل سنورێن قەزایێن زاخۆ، ئاکرێ، بەردەرەش، شێخان، دھۆک لێ ھاتینە بەلاڤەکرن و ل حەفتیا بھێت ل سەرنتەرێن قەزایێن دھۆک و ئاکرێ و زاخۆ ژی ھێتە بەلاڤەکرن.
دیسان نوونەرێ پارێزگارێ دھۆکێ ئەو چەندە ژی ئاماژەکر کو ئەو پێدڤی ب نێزیکی 50 ملیۆن لێترێن گازا سپی ھەنە بۆ ب تنێ بۆ خێزانێن پارێزگەھا دھۆکێ ژبلی دەزگه‌هێن میری و گازا نها ب پلێتێن نوو دھێتە بەلاڤەکرن و کار ب پلێتێن سالا بوری ناھێتە کرن.
