حەفت تیم بۆ ڕامالینا بەفرێ ل سنوورێ پارێزگەها دهۆكێ هاتینە پێكئینان
كەمال محەمەد شەریف، بەرپرسێ راگەهاندنا رێڤەبەرییا سەخبێری و پاراستنا رێك و پران ل پارێزگەها دهۆكێ دیار كر، د 24 دەمژمێرێن بۆری دا پێلەكا بەفرێ چەندین دەڤەرێن جودا یێن پارێزگەها دهۆكێ ڤەگرتیە، هەروەسا ژ رۆژا 22/12/2023 هەتا دوهی رۆژا شەمبی 23/12/2023 چار جاران رێیا كانی ماسێ بۆ خالا گۆمركا سەرزێری ل سنوورێ ناحیا كانی ماسێ ل دەڤەرداریا ئامێدییێ ژ بەفرێ هاتییە ڕامالین و نوكە رێك ل خالا گۆمركا سەرزێری یا ئاسایی یە و 10 سەنتیمەترێن بەفرێ لێ بارینە.
بەرپرسێ راگەهاندنا رێڤەبەرییا سەخبێری و پاراستنا رێك و پران ل پارێزگەها دهۆكێ بۆ ئاژانسا خانی گۆت: “مە حەفت تیمێن ڕامالینا بەفرێ ل سەرانسەری سنوورێ پارێزگەها دهۆكێ هەنە، هەموو رێك ژ بەفرێ هاتینە ڤەكرن، هەروەسا دوهی 23/12/2023 بەفر ل چیایێ گارەیی ژی بارییە و بەری دەمەكی ئەو رێیە ژ لایێ تیمێن مە ڤە بەفر هاتیە ڕامالین و رێ هاتییە ڤەكرن و 40 سەنتیمەترێن بەفرێ ل چیایێ گارەیی بارینە و هاتنوچوون تێدا ئاسایی بوویە”.
