حەفت ملیۆن گەشتیاران د سالا بۆری دا سەرەدانا هەرێما كوردستانێ كربوو
ئاكرێ، رەمەزان زەكەریا:
سەرۆكا دەستەیا گەشتوگوزارا هەرێما كوردستانێ ڕاگەهاند: سێ هزار و 100 بنگەهێن گەشتیاری ل هەرێما كوردستانێ هەنە ل گەل 80 هزار جهێن مانا گەشتیاران و دبێژیت: داهاتێ گەشتیاری د سالا بۆری دا ب رێژەیا 17% هەڤبەركرن ل گەل سالا 2019 زێدەبوویە.
ئەمەل جەلال، سەرۆكا دەستەیا گەشتوگوزارا هەرێما كوردستانێ د كۆنگرەكێ رۆژنامەڤانی دا ئاشكرا كر، سالانە رێژەیا هاتنا گەشتیاران بۆ هەرێما كورستانێ ب رەنگەكێ بەرچاڤ زێدە دبیت، د سالا 2021 دا چار ملیۆن گەشتیار هاتبوونە هەرێما كوردستانێ، د سالا 2022 دا شەش ملیۆن گەشتیار و د سالا 2023 ژی دا حەفت ملیۆن و 500 هزار گەشتیار هاتبوونە هەرێما كوردستانێ، ئەڤە ژبلی دو ملیۆن و 500 هزار وەلاتیێن هەرێما كوردستانێ ژی، كو د ناڤ هەرێمێ دا گەشتكرینە.
ناڤهاتیێ گۆت: “د سالا 2023 دا مۆهلەت ب 27 پڕۆژەیێن گەشتیاری هاتبوودان، گوژمێ هەموویان ئێك ملیار و 500 ملیۆن دیناربوون، 66 پڕۆژە بكرێ هاتینەدان، ژ ئەنجامێ وان هەموو پڕۆژەیان زێدەتر ژ 100 هزار دەرفەتێن كاری بۆ وەلاتیان هاتینە پەیداكرن”.
