حەلەب بوویە مەیدانا شەڕەکێ نوو ل سووریێ
ب، سه‌رجان مەحمود:
چەکدارێن تەحریر شام چەند رۆژن دەست ب ئێرشەکا دژوار ل سەر حەلەبێ کرینە و هەتا نها شیاینە چەندین تاخێن وی باژێری کۆنترۆل بکەن و شەڕەکێ دژوار ل حەلەبێ بەردەوامە و رۆسیا و ئیران ژی پشتەڤانیا رژێما سووریێ دکەن.
ژ رۆژا 27 مژدارێ ڤه چه‌کدارێن سه‌ر ب تەحریر شام ب هه‌ڤکاریا کۆمێن چه‌کدارێن دی یێن ل ئدلبێ ئێرشه‌کا دژوار برینه سه‌ر هێزێن رژێما سووریێ و د شه‌رێ سێ رۆژان دا چه‌کدارێن توندره‌و گەهشتینە ناڤه‌ندا باژێرێ حه‌له‌بێ و د ره‌وشا نها دا پێنج تاخێن رۆژئاڤایێ حه‌له‌بێ و کۆنترۆلا رێیێن د ناڤبه‌را حه‌له‌ب و ئدلبێ دا کەفتیە ده‌ستێ چه‌کدارێن توندره‌و. د هه‌مان ده‌می دا گونده‌کێ سه‌ر ب ئدلبێ ژی د ئه‌نجاما شه‌رێن سێ رۆژێن بۆری دا که‌فته ژێر کۆنترۆلا لەشکرێ سووریێ و د ئەنجاما شەڕێ سێ رۆژێن بۆری هەتا نها دا پتر ژ ٣٠٠ کەسان جانێ خوە ژ دەست داینە.
ل دووڤ ئاژانسێن هه‌رێمی پشتی به‌رفرەهبوونا ئێرشێن تەحریر شام و شکه‌ستنا لەشکرێ سووریێ ل رۆژئاڤایێ حه‌له‌بێ، فرۆکەیێن شه‌ڕی یێن رۆسیا گرۆپێن چەکدار بۆمبەباران دکەن و د ئه‌نجام دا نێزیکی دوسه‌د چه‌کدارێن تەحریر شام هاتینه کوشتن و نێزیکێ سه‌د و پێنجی لەشکرێن سووریێ ژی بووینە قوربانی و ل تاخێن کو کەفتینە ژێر کۆنترۆلا چه‌کدارێن توندره‌و دا پتر ژ سەد وەلاتیێن سڤیل ژی بووینە قوربانی.
شه‌ڕ ل حه‌له‌بێ ب دژواری به‌رده‌وام دکه‌ت و دهێته زانین هه‌ر دو تاخێن حه‌له‌بێ، ئه‌شره‌فیه و شێخ مەقسود ل ژێر کۆنترۆلا هێزێن کوردی دانه، لێ هه‌تا نها شه‌ر ژ تاخێن کوردان دووره. ئالیێن کوردی بۆ ده‌زگه‌هێن راگه‌هاندنێ ئاشکرا کرن کو وان هه‌موو ئاماده‌کاریێن خوه بۆ پاراستنا هه‌ر دو تاخێن کوردی کرینه و هژمارەکا زێدە شه‌رڤان و چه‌کێن گران ل تاخێن کوردی بجه کرینە و خوە بۆ هەر ئەگەرەکێ ژی بەرهەڤ کرینە.
ل ئالیێ دی ناڤەندا چاڤدێریا مافێن مرۆڤی یا سووریێ ژی دیار کر، یا نها ل حەلەبێ روو ددەت دەستپێکا قۆناغەکا نوو یە ل سووریێ و دێ کاریگەریا خوە ل هەموو رۆژهەلاتا ناڤین ژی کەت، چونکی ئسرائیل و ئەمریکا کار دکەن هێزێن سەر ب ئیرانێ و حزبوللا ل سووریێ نەمینن و ل ئالیێ دی نها ئەمریکا دڤێت هێزێن سەر ب ئیرانێ ل ئەبوکەمال و دێرازۆرێ ژی بهێنە دەرخستن و ژ بەر ڤێ یەکێ ژی دبیت د چەند رۆژێن بهێت دا دەست ب ئۆپەراسیۆنەکا نوو ل دژی گرۆپێن چەکدارێن سەر ب ئیرانێ بهێتە کرن.
هەمان ناڤەندێ ئەو یەک ژی دیار کریە، هێزێن بەشاری ل حەلەبێ چو شەڕەک وەسا نەکرینە و گەلەک دەڤەر رادەست کرینە، لێ دهێتە پێشبینی کرن د ٢٤ دەمژمێرێن بهێت دا هێزێن رژێما سووریێ ب هاریکاریا فرۆکەیێن شەڕی یێن رۆسیا دەست ب ئێرشێن دژوار بکەن و حەلەبێ ژ دەستێ گرۆپێن چەکدار دەرخینن.
