حەمید ئیسماعیل: كار بۆ چارەسەركرنا خالێن لاوازیێ دهێنە كرن و جەماوەرێ مە كۆپیتكا وەفاداریێ یە
دەستپێكەكا نە یا باش بۆ تیما تەپا پیێ یا یانەیا زاخۆ د خولا ستێرێن ئیراقێ دا هاتییە پێش، پشتی ب دووماهی هاتنا یاریێن گەڕا چارێ ژ قۆناغا ئێكێ ب ئینانا سێ وەكهەڤی و خوسارەتیەكێ و سەرجەمێ وان سێ خال كۆمكرینە ل رێزا 18ێ دهێت، ئەڤ رێزبەندییە بوویە جهێ نە رازیبوونا جەماوەری و نە یێ چاڤەڕێ كریبوو، سەرباری بەرهەڤیێن باش و دانانا كەمپەكێ راهێنانێ و ئینانا كۆمەكا باش یا یاریزانێن خودان شیان ئەڤە هەمی نە بوو رێكخۆشكەر زاخۆ هەتا نوكە رێزێن پێشیێ بهێت، ل دۆر ئەگەرێن وێ و پێنگاڤێن داهاتی حەمید سەلمان رێڤەبەرێ تیما زاخۆ د دیدارەكێ بڤی رەنگی بۆ رۆژنامەیا ئەڤرۆ دیار كر.
ل دەستپێكێ ناڤهاتی گۆت: تیما زاخۆ ب پشتەڤانییا ئیدارا سەربەخوەیا زاخۆ و كارگێرییا یانەیی ب شێوەكێ جودا و پێكهاتییەكێ نوو هاتییە دناڤ خولێ دا و پشتی بۆرینا چار یارییان ژی تیما مە ئێك ژ هەڤڕكێن بهێزە، هەرچەندە كادرێ راهێنانێ و پرانییا یاریزانان نوو هاتینە لەوما دەمەك بۆ دڤیا، هەرچەندە سێ وەكهەڤی هاتینە ژ چار یارییان لێ ئەگەرێ سەرەكی یێ ڤان ئەنجامان ڤەدگەڕێتە بێ چەنسییا تیمێ ژبەركو یاریزان بەردەوام گڤاشتنێ ل سەر گۆلا یانەیا هەڤڕك دكەن لێ یان ئاسنێ گۆلێ یان هەبوونا هێلا بەرەڤانییا زێدە و گۆلپارێزێ تیما دی بووینە ڕێگر، لەوما دبینم تیما مە هێش یا د هەڤڕكییان دا و یاریێن بهێت دێ باشتر و بهێزتر بیت.
ژلایەكێ دووڤە حەمید ئیسماعیل ئەوچەندە دیاركر راوەستیانا خولێ د بەرژوەندییا هەمی تیمان دا وەكو یانەیا زاخۆ د ماوەیێ بهێت دا دێ كار بۆ چارەسەركرنا ئەوان خالێن لاوازی هێتەكرن و گەشبینم دێ كادرێ راهێنانێ ل دووڤ ئەو پلانا هاتییە دانان و دبیت چەند یاریێن هەڤالینی ژی بكەت ژبۆ تێسكرنا پلانا خوە بەری دەستپێكرنا گەرا پێنجێ.
ناڤهاتی پەسنا رۆلێ جەماوەرێ یانەیێ كر و گۆت: جەماوەرێ زاخۆ كۆپیتكا وەفاداریێ یە بۆ تیما خوە و رەوشا خولا ستێرێن ئیراقێ یە كو هەمی شرۆڤەكار و خەلكێ ئیراقێ و عەرەبی سەرسۆرمانكرینە، ئەم شانازیێ ب جەماوەرێ خوە یێ دلسۆز دبەین، نە بتنێ هژمارە 12نە بەلكو هژمارە ئێكن دناڤ یاریگەهێ دا و ل سەر ئاستێ ئیراقێ، بۆ یاریێن بهێت دێ بەردەوامبن ل سەر ئێكەمینا خوە.
