خازۆكه‌ك ب گوژمه‌كێ زۆرێ پاره‌ی ڤه هاته ده‌سته‌سه‌ركرن
ئه‌ڤرۆ، حه‌مۆ محه‌مه‌د:
به‌رپرسێ پشكا راگه‌هاندنا رێڤه‌به‌ریا پۆلیسێن پارێزگه‌ها دهۆكێ بۆ رۆژناما ئه‌ڤرۆ دیار كر، پۆلیسێن بنگه‌هێ داسنیا ب هه‌ڤكاری ل گه‌ل هژماره‌كا كارمه‌ندێن ئاسیشا دهۆكێ پشتی پێزانین گه‌هشتینێ شیان تۆمه‌تباره‌كی ب تۆمه‌تا خازۆكیێ ده‌سته‌سه‌ربكه‌ن كو بۆ ده‌مه‌كێ درێژه ڤی كاری دكه‌ت و گوژه‌كێ مه‌زنێ پاره‌ی ژی ل گه‌ل بوو.
موقه‌دمێ مافپه‌روه‌ر هێمن سلێمان، به‌رپرسێ پشكا راگه‌هاندنا رێڤه‌به‌ریا پۆلیسێن پارێزگه‌ها دهۆكێ ئاشكرا ژی كر، وی تۆمه‌تباری ب خوه دانپێدان ب تاوانا خوه كریه كو ب گه‌له‌ك رێكان و ل گه‌له‌ك جهێن جودا، مینا: دهۆكێ، سێمێلێ، ته‌ناهیێ و جهێن دی یێن پارێزگه‌هێ دگه‌ڕیێت و خازۆكیێ دكه‌ت و گۆت: “پشتی ئه‌ڤ خازۆكه هاتیه ده‌سته‌سه‌ركرن، گوژمه‌كێ زۆرێ پاره‌یێ جوراوجور ڤێ هاتیه گرتن، كو پتری حه‌فت ملیۆن دینارێن عیراقی، 120 هزار لیره‌یێن سۆری و گوژمه‌كێ پارێ توركی و117 وه‌ره‌قێن دۆلاری ژی ڤێ بوون”.
گۆتژی: “ئه‌م وه‌لاتیێن خوه ئاگه‌هدار دكه‌ین، پتریا وان كه‌سێن خازۆكیێ دكه‌ن پێدڤی پاران نینن، به‌لكو ئه‌ڤ تاوانه بۆ خوه كریه كار و پیشه و به‌رده‌وام خازۆكیێ دكه‌ن و وه‌لاتیان سه‌ردا دبه‌ن، وه‌لاتیێن مه ژی ژ دلپێڤه‌مان پاران دده‌نه كه‌سێن هوسا، ژ به‌ر ڤێ چه‌ندێ ئه‌م دخوازین وه‌لاتیێن مه دهشیار بن و باوه‌ریا خوه پێ نه‌ئینن و هه‌ڤكار بن ل گه‌ل مه”.
هێمنی زێده‌تر گۆت: “رۆژانه كه‌سێن هوسا ژ لایێ پۆلیسێن مه یێن دهۆكێ و نه‌هێلانا گونه‌هباریا و هه‌وارهاتنێ و بنگه‌هان ڤه دهێنه گرتن، وه‌سا بۆ مه دیار دبیت كو زۆربه‌یا كه‌سێن دهێنه گرتن، ره‌وشا وان یا دارایی یا باشه و ب پاره‌نه، ب تنێ خازۆكی یا بۆ خوه كریه كار و پیشه، ژ به‌ركو پاره‌كێ گه‌له‌كێ باش پێڤه دهێت”.
وی تۆمه‌تباری ژی خویا كر، ئه‌و ترۆمبێله‌كێ ب كرێ دگریت و ل جهێن جودا یێن پارێزگه‌ها دهۆكێ دگه‌ڕیێت و كارێ خازۆكیێ دكه‌ت و ئه‌و پاره ژی ب وێ رێیێ كۆمكرینه.
