خالد موشیر: پێكهاتیێ تیمێ ب دووماهی هاتییە و پێشبینییا ئاست و ئەنجامێن باشتر دكەم
پشتی بۆرینا حەفتییەكێ ل سەر بەرهەڤیێ تیما تەپا پێی یا یانەیا دهۆك ئەوا ل دووڤ پلانا كادرێ راهێنانێ دێ رۆژانە بەردەوامبیت و دانانا كەمپێن راهێنانێ و یاریێن هەڤالینی خوە بەرهەڤكرن بۆ وەرزێ نوو 2022- 2023 یێ خولا ئیراقێ یا پیشەكاران و دهێتە چاڤەڕێكرن هەڤڕكیێن وێ ل دەهێ چڕییا ئێكێ یا بهێت ئەوا دێ بۆ جارا ئێكێ ل دووڤ سیستەمێ پیشەكاران و سەرپەرشتییا فیدراسیۆنا لالیگا یا ئسپانی هێتە بڕێڤەبرن.
ل دۆر دووماهی پێشهاتە و بەرهەڤیێن دهۆكێ خالد موشیر سەرپەرشتێ تیمێ بۆ رۆژنامەیا ئەڤرۆ گۆت: بۆ وەرزێ نوو یێ خولا پیشەكاران كارگێرییا یانەیێ و كادرێ راهێنانێ كار ل سەر درۆستكرنا تیمەكا رێكخستی و بهێز بۆ هەڤڕكیێن خولێ و پشتی ب سۆپاسی ڤە د. عەلی تەتەر پارێزگارێ دهۆكێ پشتەڤانییا خوە یا مەعنەوی و ماددی بۆ یانەیێ دیاركری، لژنەكا تایبەت یا ئینانا یاریزانان هاتبوو دانان و چەندین یاریزانێن باش و خودان سەربۆر ئیناینە دناڤ رێزێن تیمێ دا و چەند یاریزانێن دی گرێبەستێن وان هاتینە نووكرن ژ وانا سێ یاریزانێن پیشەكار یێن وەرزێ بۆری ئەوژی كۆتیڤۆاری یانیك زاكێری، یێ بەرازیلی لۆكاس مۆزێز ویێ غانا نۆرۆ سۆلێ، دیسان ئینانا سێ پیشەكارێن دی ئەو ژی یێ بەرازیلی دۆمینێك ڤێنێسیۆس و هەردو پیشەكارێن غانا رۆبێن ئەكوا و ماكسوێل كوا، بڤێ چەندێ پرۆسێسا ئینانا یاریزانان ب دووماهی هاتییە و چو یاریزانێن دی ئەم نا ئینن ب تنێ هەكە ل دووڤ داخوازا راهێنەری بیت.
هەروەسان ناڤهاتی ئەو چەندە ژی گۆت: هەرچەندە وەرزی ئەڤ سالە دێ بهێزتر بیت ژبەركو پرانییا یانەیان بەرهەڤیێن باش كرینە، لێ گەشبینم تیما مە بۆ وەرزێ ئەڤ سالە ب ئاست و ئەنجامێن باشتر بیت ژ وەرزێ بۆری و دێ پشكدارییەكا سەرفەراز بیت ب هیڤییا وێ یەكێ جەماوەرێ مە خوەشیێ ژ ئاست و ئەنجامێن تیما خوە بینن و ب ئۆمێدین دێ وەرزێ ئەڤ سالە پشتەڤانێن یانەیا دهۆك ب رێژەكا مەزنتر دێ ل سەر پەلۆكێن یاریزانان پشتەڤانیا تیمێ كەن.
كاپتن خالد موشیر ب هەبوونا پشتەڤانییا پارێزگارێ دهۆكێ بۆ یانەیێ ب گرنگی و پالدەرێ پێشكەفتنا ئاست و ئەنجامان دا زانین و گۆت: جهێ دەستخووشیێ و سۆپاسیێ یە پارێزگارێ دهۆكێ خوە ل یانەیا دهۆك كرییە خودان و پشتەڤانییا خوە و حوكمەتا هەرێما كوردستانێ بۆ یانەیێ دیاركرییە و سۆزدایە بۆ كەمپێ راهێنانێ یێ دەرڤە تیما مە بۆ وەلاتێ توركییا بهێتە هنارتن و دێ چاڤەڕێ پاسپۆرت و ڤیزەیێن هەمی یاریزانێن خوە بین وەكو قۆناغا دووماهیێ یا بەرهەڤییا بەری ب كەڤینە د وەرزێ نوو یێ خولا ئیراقێ یا پیشەكاران دا.
