خانكێ بەر ب قووناغەكا نوو یا ئاڤەدانییێ ڤە دچیت
ئەڤرۆ، دلۆڤان ئاكرەیی
رێڤەبەرێ ناحیا خانكێ دیار كر، ل خانكێ ب كۆژمێ ١٠ ملیار دیناران پرۆژەیێن هاتینە بجهئینان، ژمارەیەكا پرۆژەیان د نوكە دا د قوناغێن بجهئینانێدانە كۆ بیاڤێن رێ وجادە و ئاڤ و ئاڤرێژ و پەروەردە و وەرزشێدا ب خۆڤە دگریت.
زەردەشت شێخ شامۆ رێڤەبەرێ ناحیا خانكێ سەر ب قەزا سێمێلێ ڤە بۆ رۆژنامەیا ئەڤرۆ گۆت: ل ١٣/٦/ ٢٠٢٥ پشتی خانكێ بوویە ناحیە و ل تەمەنێ ناحیە بوونا وێ حوكمەتا هەرێما كوردستانێ گرنگیەكا زۆر ب وێ دایە، ب ئاوایەكی ب كۆژمێ ١٠ ملیار و ٤٢١ ملیون و ٤٥٢ هزار دیناران ١٦ پرۆژە ل بیاڤێن جودا یێن خزمەتگۆزاری ل سنۆرێ ناحییا خانكێ ئەنجامداینە و ١٢ ل وان پرۆژەیان د نوكەدا كەڤتینە د خزمەتا وەلاتییاندا و كار ل سەر چوار پرۆژەیان ژی بەردەوامە دا كۆ بلەز ئەو پرۆژە ژی بكەڤنە د خزمەتا وەلاتییێن ڤێ دەڤەرێدا.
رێڤەبەرێ ناحییا خانكێ زێدەتر ئاشكرا كر، ئەو پرۆژەیێن ژلایێ كابینەیا نەهێ یا حوكمەتا هەرێما كوردستانێڤە هاتینە ئەنجامدان، دبیاڤێن جودا جودا دا بووینە، وەكۆ قێركرنا رێكا سەرەكی، ئاڤرێژ ل سەنتەرێ ناحیا خانكێ و چێكرنا ١٣ رێیێن ناڤخۆ، دروستكرنا ئاڤرێژ ل كولانێن جودا یێن خانكێ، نووژەنكرنا قوتابخانەیا زەینیا و ئاڤاهییێن سازییێن میری، دانانا تابلویان ل گوندان، پرۆژێ شتایگەر ب دو قوناغێن جودا كۆ ل سەر پێشینەیا باژێرڤانییا ناحیێ هاتینە درۆستكرن، چێكرنا یاریگەهەكا وەرزشی بۆ یاریا تەپاپێی، قێركرنا رێكا گوندێ باختمێ كۆ گوندەكێ مەسیحییانە، ب درێژاهییا گوندی هەتا كەمپا كەبرتوو یا ئاوەرەیێن شنگالێ و چێكرنا ١١ رێیێن جودا بۆ كولانێن ناڤخۆ یێن ناحیێ، چێكرنا دو جادەیان ب درێژاهییا نێزیكی كیلومەترەكی ل گەل ئاڤرێژێن گەرەكا خانكێیا نوو، چێكرنا ١٤ رێیێن ناڤخۆ ل گەرەكێن جودا ل گەل ئاڤرێژێن وان، چێكرنا رێیا رووباری ب درێژاهییا ١كم، ئاڤاكرنا هۆلەكا پرسەیان ل گوندێ كەمونا و چێكرنا یاریگەهەكا بچووك یا گرتی بۆ تەپاپێی، چێكرنا ٢١ رێیێن ناڤخۆی، چێكرنا هزار و ٩٥٧ مەترێن ئاڤرێژان ل گەرەكێن جودا ل ناحییا خانكێ.
