خانمێن ھەلەبچە نوونەرێن عیراقێ نە
ئەڤرۆ نیوز:
ل ئەینیا بۆری تیما خانمێن یانا ھەلەبچە یا باسکتبۆلێ بۆ یاریا 3×3 گەشتنە وەلاتێ ئیمارات ژبۆ پشکداریکرنێ وەکو نوونەرێن عیراقێ د قارەمانیا عەرەبی دا ئەوا دێ ھەڤرکیێن وێ ئەڤرۆ ئێک شەمبی ب پشکدارییا 12 یانەیا ل ھولا شاریقە ھێنە کرن.
ل دۆر ڤێ یەکێ رزگار رەئۆڤ راھێنەرێ تیما باسکتبۆلا یانا ھەلەبچە بۆ رۆژناما ئەڤرۆ گۆت: یانا ھەلەبچە وەکو نوونەرا ئێکانە یا عیراقێ و کوردستانێ دێ پشکداریێ دڤێ قارەمانیێ دا کەت کو شاندێ وێ پێکھاتییە ژ چار یاریزانان و راھێنەر و سەرپەرشتیارەک، ئەڤ قارەمانیە یا فەرمییە ژلایێ ئێکەتیا باسکتبۆلا عەرەبی ڤە ھاتیە رێکخستن کو دبیتە قارەمانیا ئێکێ سالانە بھێتە ئەنجامدان. ھەروەسان ناڤھاتی لدۆر بەرھەڤیان گۆت: یاریزانێن تیمێ شارەزاھیەکا باش یا ھەیی و بەرھەڤی یێن کرین، سەرەرایی ئەڤە جارا ئێکێ یە لسەر ئاستێ عەرەبی دھێتە کرن و پێزانین لسەر چ تیمێن پشکدار نینە، بەلێ گەشبینم ب یاریزانێن خۆ، کو شیانێن ھەین ھەڤرکیێ بکەن و ناڤێ عیراقێ و کوردستانێ بلندبکەن. ژلایەکێ دویڤە رزگاری گازندە کرن کو چ لایەنیێن وەرزشی پشتەڤانیا وان نەکرییە سەرەرایی داخازیا وان کری و چوونا وان لسەر کیستێ خۆ یێ تایبەت بوو.