خانییەكێ تژی دەرز
رەمەزان زەكەریا
هەموو ئێڤارییا دەمێ هەتاڤ ل پشت چیایێن بلند بەرەف ئاڤابوونێ دچیت، دچمە وی جهێ كو هەردەم تە حەژێ دكر، ل سەر وێ بلنداهییێ كو رۆناهیێن باژێری تێدا وەكی ستێرێن ئاسمانی رەنگڤەدەن، هەموو جارێ ب تنێ د روونشتم ل بن سێبەرا تاریاتییەكا كویر ل جهێ مە ناڤێن ئێكودو ل سەر كەڤرەكی بێ رح دنڤیسین، وەك بێژی مە دڤیا هەبوونا خۆ د ناڤ جەرگێ چیا دا ئاڤا بكەین، دەمی ب دەنگەكێ لەرزی ڤە و دللەكی پڕ ژ هیڤی سویند خوار كو هەتا رح د سینگێ من دا بمینیت دێ دگەل تە بم ئەگەر پێكڤە ژی نەبین.
نوكە باژێر یێ بێدەنگە، د ناڤ وێ تاریاتییێ دا دخەندقم، ئەڤ سویندا من خواری نوكە بوویە بارەكێ گران ل سەر ملێن من، وەك وێ چەندێ چیایەك ل سەر سینگێ من بیت، شەڤ هاتییە و تارییێ هەموو رەنگێن ژیانێ رەشكرینە و ژ تاریاتییێ ناترسم، ژ بێدەنگییا تە دترسم و وەك وێ چەندێ كو د خانییەكێ ڤە بم تژی دەرز بن، دناڤ دیواراندا و نزیك بیت ب هەرفیت.
هەموو ئێڤارییا دەمێ رۆژ ئاڤا دبیت ژانێن من یێن كو د رۆژێ دا د بێدەنگ ژبەر دەنگێ مرۆڤا و پۆر و كەوان ب شەڤێ زێدە دبوون، ئەو دەنگێ تە یێ كو ب رۆژێ وەك خەونەكا دویر دهاتە بەر گوهێن من، ب شەڤێ دگەل بایێ چیا تێكەل دبیت و دبیتە هەوارەكا بلند وەك بێژی گوهێن من كەڕ دكەت و داخوازا زڤڕینا تە دكەت، بەلێ رۆژ د هەلێت، ژبلی دیتنا تیشكێن رۆژێ ل سەرێ چیا، چاڤەرێبوون بێ دیتن ب دووماهی دهێت.
بێهناتە ب رۆژێ وەك بێهنا گولێن هشكبوویی دناڤ پەرتووكان دا بەلاڤە، ب شەڤێ ژ نشكەكێڤە ژ كەڤر و ئاخا چیا بلند دبیت وەكی بێهنا گول نێرگزێن كو چ جاران نامرن دناڤ هەستیكێن من دا بەرزە دبیت و خوینا من گەرم دكەت. تو د ناڤ تارییێ دا د گەل من دژی، هەر جارەكا ئەز چاڤێن خۆ دگرم تە دبینم كو ل بەرامبەر من روونشتی و بەرێ خۆ ددەی ستێرێن هنداڤی باژێری، بەلێ دەمێ چاڤێن خۆ ڤەدكەم ژبلی غەریبیێ چ تشتەكێ ب رەنگێ مرۆڤێن ئادەمی نابینم.
خۆزی رۆژ ئاڤا نەبا، هەوارا رحەكا ماندیبوو بۆ دەمێ كو رەنگێ ئاسمانی ژ سۆرەكێ گەش بوویە تاریاتییەكا كویر، هەستێن من ژی دگەل وێ گوهۆڕین رۆژ چوو و هیڤیێن من ژی دگەل خۆ برن. نوكە ئەز و ئەڤ كەڤرێ ناڤێن مە ل سەر و ئەڤ شەڤا درێژ كو چو جاران ب دووماهی ناهێت پێكڤە ماینە، هێشتا د غەریبییا دیتنا تەدا هزر دكەم، پشتی ڤێ هەموو نەخۆشییێ خۆشیەك دێ هێت و ب هیڤی هەموو رۆژێ زوو ژ خەو هشیار دبم، وەك وێ چەندێ ببێژم تە سپێدە باش!
