خرابترین کەرستێ ھاتیە دروستکرن ل ھەموو جیھانێ دارکێن پاقژکرنا گوھینە
ئه‌ڤرۆ نيوز:
نوشدارەکێ تایبەتمەندێ گوە وگەوری ودفنێ ل پارێزگەھا دھۆکێ دیارکر کو خرابترین کەرەستێ دھێتە بکارئینان دناڤ ھەموو وەلاتیاندا بۆ پاقژکرنا گوھی دارکێن گوھینە، چونکو ئەڤ دارکێن گوھان وھەموو کەرەستێن دێ یێن پاقژکرنا گوھی دبنە ئەگەر گوە گران ببن و زیانێن ساخلەمیێ دگەھیننە گوھێن وەلاتیان و پێدڤی ناکەت چو وەلاتی گوھێن خوە پاقژ بکەن، چونکو خودێ مەزن گوە ھوسا یێ چێکری پێدڤیە پاقژکرنێ نینە و ئەو ب خوە خوە پاقژ دکەت.
د. رێبەر مەحمەد خەلیل، تایبەتمەندێ نەخۆشیێن گوە و گەوری ودفنێ دیارکر کو پێدڤی ناکەت چو وەلاتی گوھێن خوە ب دارکێن گوھی وکەرستێن دی یێن ھەمە جۆر پاقژ بکەن، چونکو خودێ مەزن گوە یێ ھوسا چێکری ئەو ب خوە رادبیت ب پاقژکرنا خوە و گۆت: گوە بخوە مادێ شەمایێ چێدکەت ئەو مادێ شەمایێ گوھی پاقژدکەت و پاراستنا گوھی دکەت، موخابن ھەتا نوکە پرانیا وەلاتیان ب رێکێن نە دروست گوھێن خوە پاقژ دکەن، تایبەتی ژی ب رێکا دارکێن گوھان، کو زۆر دمشەنە ل بازاری، دبنیاتدا زۆر خەلەتن و نابیت ب چو شێوەیەکی وەلاتی گوھێن خوە ب دارکێن گوھی پاقژ بکەت، چونکو دارک گەلەک جاران موویەکی دبەنە دگوھی دا، یان پیساتی ب رێیا دارکی دچیتە د گوھی دا و زۆر کارتێکرنێ ل ساخلەمیا گوھی دکەت.
د. ریبەر ئەوژی دیارکر کو گوە بخوە مادێ شەمایێ چێدکەت و گوە پێ دھێتە پاقژکرن، ئەو ب خوە دگەل خوارنێ یان وەختێ نڤستنێ ئەو مادێ شەمایێ ژ گوھی دەردکەڤیت و خرابترین کەرستێ ھاتیە دروستکرن ل ھەموو جیھانێ دارکێن پاقژکرنا گوھینە، دەمێ وەلاتیەک دەڤ خوە گوھی خوە دارکی پاقژ دکەت ئەو بخوە پیستر لێ دکەت، چونکو ئەو مادێ شەمایێ پالڤەدەت د چیتە گوھی دا و پەردا گوھی دگرت و دئەنجامدا گوە گران دبن.
ناڤبری ئاشکرا کر کو پشتی سەرشووشتنێ ب تنێ ھەکە وەلاتێ کلینسێ ل گوھێ خوە بدەت پیچەکێ پاقژ بکەت زۆر مفاترە، ئەوژی ھەکە وەلاتی نەبەتە دناڤ گوھێ خوە دا، چونکو گەلەک جاران وەلاتی ژبەر ب کارئینانا کەرستێن پاقژکرنێ گوھێن خوە گران دکەن و دەمێ شەما گوھی قەپات دکەت، پێدڤیە سالێ جارەکێ وەلاتی سەرا نوشداری بدەت بۆ پاقژکرنێ، چونکو ھندەک وەلاتی ژبەر گرانبوونا گوھێ خوە نەخۆشیێ ژ سەری خوە دبینن.
د. ریبەر مەحمەد خەلیل، تایبەتمەندێ نەخۆشیێن گوە و گەوری ودفنێ دیارکر ژی گەلەک جاران دەمێ زارۆ دبینیت دایک وبابێن وی و مروڤێن مەزن د مالێ دا گوھێ خوە ب دارکێن گوھی پاقژ دکەن، ئەو زارۆ چاڤ ل وان دکەت وھەموو دارکی دبەتە د گوھێ خوە دا و گەلەک جارا دچیتە ژوو ڤە و پشکا ناڤ گوھی ژی تێکدچیت ب تایبەتی ل دەڤ زارۆیان.
