خـــــودێ ژتـــه رازى بیت پــــه‌رلــه‌مان!
ژ نڤێسینا ، عسمه‌ت ره‌جەب:
مه نه‌دڤیا وێنێ ده‌زگه‌ه وده‌سهه‌لاتا یاسا دانانا عێراقێ كو دبیته مه‌زنترین ده‌زگه‌ه دكارپێكرنا دیموكراتیه‌تیا ده‌وله‌تا عێراقا فیدرالدا ب ڤى ڕه‌نگى كرێت و وه‌ستایى بیت ب تایبه‌تى ل دوماهیا خولا چار سالیدا یا كو ل رێكه‌فتى 30/6/2018 ب دووماهى هاتى، ئه‌ڤ خوله یا بێ به‌رهه‌م وتوزه‌كى بوو و نه دوژمن و نه‌هه‌ڤال و لاینگر پێ دكه‌یفخوش نه‌بون، و ڤێ خۆلێ شكه‌ستن د هه‌موو بریارێن خۆدا ئینایه یێن ژبۆ خزمه‌تا گه‌لێ عێراقێ هاتینه ده‌ركرن.
به‌لێ ل لایه‌كێ دیتر سه‌ركه‌فتى بووینه دپێشكێشكرنا ته‌خشان په‌خشانان بۆ خۆ وه‌كو په‌رله‌مانتارێن په‌رله‌مانى، چار سالێن ره‌به‌ق و لدووڤ ئێكدا په‌رله‌مانى گه‌له‌ك بریار ده‌ركرن و یا دوماهیێ نه‌په‌سه‌ندكرنا ئه‌نجامێن كریارا دیموكراتى و سیاسى بوو ل عیراقێ، په‌رله‌مانى دروونشتنا خویا دووماهیێ دا بزاڤ كر ژیێ خۆ درێژ بكه‌ت ودیسان ئه‌نجامێن هه‌لبژاردنا ژى په‌سند نه‌كه‌ن ونه‌كو ژ به‌ر چ تشتێن گرێدایى گه‌لێ عێراقێ, به‌لكو بتنێ ژبه‌ر هندێ یه , چونكه هنده‌ك ئه‌ندامێن په‌رله‌مانى یێن خودان بریار وده‌ستهه‌لات ده‌رنه‌چووین ودهه‌لبژاردناندا وسه‌رنه‌كه‌فتین,وژلایه‌كێ دویڤه ئه‌ڤ خولا په‌رله‌مانى یا كه‌فتیه ژێر گه‌له‌ك تاقیكرنان وهنده‌ك ژوان بزه‌حمه‌ت بون وهنده‌ك ب ساناهى بون و یا خویایه په‌رله‌مان سه‌رنه‌كه‌فت دئاماده‌كرنا بودجا سالانه یا 2018 ودیسان سه‌رنه‌كه‌فت دبریارێن خۆدا یێن دوماهیا ئه‌یلولا سالا2017 ده‌ركرین وكو 13 بریارێن زالمانه بون تولڤه‌كرن پێڤه دیاربون ودژى مه‌زنترین پێكهاتا نه‌ته‌وه‌یى یا عێراقێ هاتینه ده‌ركرن, ول ده‌مێ خواندنا من بو وان بریاران یاسایى یێن ژجهێن فه‌رمى یێن په‌رله‌مانى هاتینه ده‌ركرن دسالا 2017 دا.
من یاسایه‌كا بتنێ ژى نه‌دیت كو دخزمه‌تا گه‌لێ عێراقێدا هاتبیته ده‌ركرن,په‌رله‌مانى دڤێ سالێدا سێ راسته‌ڤه‌كرن ل سه‌ر یاسایا هه‌لبژاردنا یا ژماره(45) یا سالا2013 كرن، براستى ئه‌ڤه جهێ یاریپێكرنێ یه ، چونكه ل ده‌مێ ئه‌و سه‌رنه‌كه‌فتین دهه‌لبژاردناندا راستڤه‌كرنه‌كا دیتر بو وێ یاسایێ كر, وئه‌ڤه پشتى هه‌لبژاردنا بوو وئه‌ڤه پێلێنانه‌كا یاسایى و ئاشكرا بوو ل دستورى هاتیه‌كرن, وئه‌و یاسایێن دیتر یێن هاتینه ده‌ركرن گه‌له‌ك دئاست ناڤه‌ندى ونزم بون, وپڕانیا وان یاسایا گرێدایى روژه‌ڤا دوبلوماسى یا ده‌وله‌تێ بون, ول سالێن 2014 و2015 و2016, دوخا په‌رله‌مانى ژ یا سالا2017 باشتر نه‌بوو, چونكه سێ پشكێن وولاتى داگیركرى بون ژلایێ داعشێ ڤه, وهه‌ر وه‌سان سێ پشكێن خه‌لكێ عێراقێ ئاواره ببون وب زۆر هاتبوونه ده‌ركرن ل سه‌ر جهێن وان, وهه‌ر وه‌سا ئابوریا عێراقێ ب ره‌نگه‌كێ گشتى یا ژبه‌رئێكچوى و لاواز بوو پرۆژێن خزمه‌تگوزارى دراوستیایى بون بێ كارى رۆژ ب رۆژ زێده‌تر لێدهات وپڕانیا په‌رله‌مانتاران ل ده‌ڤگه‌رمى ول گه‌شتان ل ده‌رڤه‌ى وولاتى دگه‌ریان و گرێبه‌ست دگه‌ل كومپانیا ودگه‌ل گه‌نده‌لان گرێددان وهه‌روه‌سا گرێبه‌ست دگه‌ل كه‌سێن خودان بریار ئه‌وێن هاتینه راسپارده‌كرن ب دراڤ وچێكرنا پرۆژان بۆ ئاواران گرێددان ژبۆ قازانجێ خۆ, هه‌ر چوار سالێن خولا په‌رله‌مانى ب ره‌نگه‌كێ نه‌رێنى برێڤه چون وب لاپه‌ره‌كێ ڕه‌ش ئه‌ڤ قوناغا دیروكا عیراقێ دهێته نڤێسین.
خودێ ژ په‌رله‌مانێ مه رازى بیت، و هیڤیخوازین ژ یه‌زدانێ دلوڤان كو په‌رله‌مانه‌كێ نوو و بهێز و كارا كو بشێت خۆ ل به‌ر سینگێ هه‌موو ئاسته‌نگ و ئاریشان بگریت و ئاریشێن عێراقێ ب دوماهى بینیت و هزرا داعش و هه‌مى هزرێن توند ره‌و چ یێن سیاسى یان ئابوورى ژناڤ ببه‌ت و دورپێچێن ئابورى نه‌دانیته سه‌ر چو پێكهاتێن گه‌لێ عێراقێ هه‌ر وه‌كو هاتیه دانان ل سه‌ر هه‌رێما كوردستانێ ل ئه‌یلولا بورى ویاسایێن دخزمه‌تا گه‌لێ عێراقێدا بن ده‌ربكه‌ت وببیته لایه‌نى چاڤدێریا نیشتیمانى وكار بو چاره‌سه‌ركرنا هه‌مى كێماسیان بكه‌ت، نه‌ك په‌رله‌مان وپه‌رله‌مانتار ل دویڤ ده‌ڤگه‌رمى و گرێدانا گرێبه‌ستان بۆ خۆ بگه‌رێن.
