خنێکێـن مـە
رەمەزان ئیسماعیل گەرەگوهی
خنێکێن مە..
مە دەشت و چۆل و چیا هەین
مە ئاڤ و گول و گیا هەین
مە سیبەرێن
بن داربەڕوی و بن بیا هەین
خنێکێن مە..
مە چەم و ڕەز و بیستان هەین
مێرگ و چیمەن و کویستان هەین
گۆرانگەھ و
زۆم و زۆزان و پاوان هەین
خنێکێن مە..
مە گۆم و کانی و ڕووبار هەین
مە شیڤ و جۆک و جۆبار هەین
سەیرانگەھ و
ب هزاران کەڤر و زنار هەین
خنیکێن مە..
مە ڕزدە و ناوسک شکەفت هەین
مە زێڕ و ئەلماس و نەفت هەین
بیرەوەری و
جەژن و سەرسال و هەلکەفت هەین
خنێکێن مە..
مە دەسکەفتی و پەڕلەمان هەین
مە مێرخاس و قەهرەمان هەین
زانینگەھ و
ڕەوشەنبیر و هەلبەستڤان هەین
لێ مخابن..
مە ئێکڕێزی و برایەتی و تفاق نەبن
ڕێبەرێن مە بسەروچاڤێن ئێکدو ڤەبن
هەتا ئەڤرۆ
د بێ تفاق و د پەرتەوازە و بژالەبن
