خهلكێ ئامێدیێ ژ دهرامهتێن گوندێن خوه بێ بههر بوویه
ئامێدیێ، مهحمود نهێلی
ژ ئهگهرێ شهرێ دناڤبهرا گهریلایێن پهكهكێ و لهشكهرێ توركیا و توپبارانكرنا رۆژانه و لهشكهر كێشیا سهر دهڤهرێ و دانانا خالێن نوو ل سهرێ هند چیایان و نێزك بوونا شهری ژ گوند و كومهلگههان، هژمارهكا زۆرا وهلاتیێن قهزا ئامێدیێ بێ بههر بوونه ژ دهرامهتێن گوندێن خوه و ڤێ یهكێ كارتێكرن ل سهر رهوشا وانا ئابووری كریه.
نێچیر سدقی ئاكنجیێ سهنتهرێ ناحیا دێرهلۆك بۆ رۆژناما ئهڤرۆ دیار كر، شهرێ ڤێ داویێ و توپ بارانكرنا گوندێن وان یا رۆژانه گهلهك كارتێكرن ل خهلكێ دهڤهرێ كریه چو ژلایێ ئابووری ڤه چ ژی ژلایێ دهروونی ڤه و گۆت: د سالێن چویی دا سالێ جارهكی یان دو جاران رێك ب مه دهاته دان سهرهدانا گوندێن خوه بكهین بۆ مهرهما ئینانا دهرامهتێ چاندنێ و ئهڤ یهكه ژی ههتا رادهیهكی باش بوویه ئهم شیان مفا ژ دهرامهتێ گوندێن خوه وهربگرین، لێ ئهڤ ساله ب ئێكجاری سهرهدانا گوندان نهمایه و ئهم نهشێین هیچ دهرامهتهكی ل گوندی بینین.
دیار كر، د سالێن چویی دا، وان قازانجهكا زۆر دكر ب چاندنێ و چهندین جۆرێن دهرامهتی وی د بازاری دا دفروتن و مفایهكی باش دگههشتێ، لێ نوكه ب چ ئاوایهكی ئهو نهشێن بچنه سهر گوندێن خوه و بههرا پتر ژی داروباێن دهڤهرا وان هاتیه سوتن و هشك بووینه و رۆژانه ئاگر ب چیایی و رهز و باغێن وان دكهڤیت بتنێ ب چاڤێ زل سهح دكهنێ و نهشێن بچن ڤهمرینن ژی.
ناڤهاتی هیڤی ژی خوهستن ئهڤ شهرێ دناڤبهرا پهكهكێ و توركیا دا ل دهڤهرا وانا نهمینیت و شهری ببنه ناڤ ئاخا توركیا، چونكو ئهڤ شهره نهیێ وانایه، دا كو ئهو ب ئازادانه بچنه سهر گوندێن خوه و دهست ب چاندنێ و ئینانا دهرامهتی بكهن، ژ بهر كو سالانه داهاتێ ڤان گوندان گهلهك زۆرن و ههموو گهنجینهیه بۆ خهلكێ دهڤهرێ و دشێین مفایهكی باش ژ بهرههمێن چاندنێ و گل و گیایێ چیایی ههروهسا دهرامهتێ خوه وهربگرن و تهكهست ژی كر، ههكه بهێلن خهلك بچنه سهر گوندێن خوه ههر ئهو پێدڤی ب موچهی نابن و ئهڤه ژی دێ بیته بار سڤكیهك بۆ حكومهتێ ژی و دهلیڤێن كاری ژی دێ پتر بۆ گهنجان و خهلكێ دهڤهرێ هێنه پێش و بارا پترێ ژ خهلكێ مه دێ بنه خودانكار.
