خه‌لكێ مه پتر حه‌زژ سترانێن سینگل دكه‌ت
ئه‌ڤرۆ ، زنار تۆڤی:
سترانبێژ له‌وه‌ند به‌كركو خه‌لكێ باژێرێ عه‌فرینێ یه ل رۆژئاڤایێ كوردستانێ، پشتی ره‌وشا رۆژئاڤایێ كوردستانێ تێكچوویی و باژێرێ عه‌فرینێ ژ ئالییێ ده‌وله‌تا تورك ڤه هاتییه داگیر كرن، وی قه‌ستا باكوورێ كوردستانێ كرییه و نوكه ل باكوورێ كوردستانێ دژیت، د دیداره‌كێ دا بۆ رۆژناما ئه‌ڤرۆ دیار كر:بۆ ده‌مێ پتر ژ ساله‌كێ وی كار د چێكرنا به‌رهه‌مێ خوه یێ نوو دا دكر و ل ڤان رۆژێن بوری وی به‌رهه‌مێ خوه یێ نوو ب ناڤێ (هه‌لبه‌ستا من) به‌لاڤ كرییه، ئه‌و به‌رهه‌مه ژ 12 تراكان پێك دهێت، وی لبه‌ره هه‌موو سترانێن وێ ئه‌لبۆمێ ژی كلیپ بكه‌ت، ب هه‌لكه‌فتا جه‌ژنا نه‌ورۆزێ وی لبه‌ره كلیپه‌كا نوو ب ناڤێ كه‌نگی دێ ڤه‌گه‌ری به‌لاڤ بكه‌ت، هه‌روه‌سا وی ڤییایه ب رێیا ده‌نگێ خوه خزمه‌تا خه‌لكێ كوردستانێ و هونه‌رێ كوردی بكه‌ت.
له‌وه‌ندی ئه‌و ژی گۆت: هه‌تا نوكه وی چه‌ندین سترانێن سینگل و كلیپ چێكرینه، وی ڤییایه ب باشترین ره‌نگ خزمه‌تا سترانا كوردی بكه‌ت، لدووڤ گۆتنا وی باشتره هه‌موو جۆرێن موزیكێ بێخینه د خزمه‌تا هونه‌رێ كوردی دا، لێ دڤێت هونه‌رمه‌ندێن كورد خوه ژ موزیكا ئارابێسك دوور بێخین، هه‌روه‌سا ئه‌ڤ ساله من به‌رهه‌مه‌كێ نوو به‌لاڤ كر، لێ ئه‌ز پتر حه‌ز دكه‌م سترانێن سینگل و كلیپان چێكه‌م، چونكی نوكه وان پتر رۆلێ خوه ژ یێ چێكرنا به‌رهه‌مێن نوو هه‌یه، ئێدی خه‌لكێ مه ژی پتر حه‌ز ل سه‌ر سترانێن سینگل و كلیپان هه‌یه، دیسان ژ بۆ چێكرنا هه‌ر به‌رهه‌مه‌كێ نوو، گه‌له‌ك مه‌زاختن دڤێت و چ داهات بۆ مه ژێ ناهێت.
