خه‌ونا ده‌وله‌تا كوردی
گه‌لێ كورد ل ده‌مێن مێژوویا دوور و درێژا خوه دا گه‌له‌ك خه‌ون و هیڤی هه‌بووینه و گه‌له‌ك جاران به‌رێ ره‌نج و خه‌بات و هه‌ولێن خوه ژ ده‌ست داینه، هنده‌ك ژ ڤان ژده‌ستدانان ئه‌و بخوه لێ به‌رپرسیاره و هنده‌كان ژی دوژمن و ده‌ستێن ده‌ره‌كی هوَكارێن سه‌ره‌كی بوون.
ل ده‌مێ پتر ژ سه‌ده‌یه‌كێ خه‌باته‌كا بێ ڤه‌قه‌تیان كریه و خوون و مالێ خوه به‌خشییه ل پێناڤی خه‌ونا سه‌رخوه‌بۆنێ دا، هه‌ر چه‌نده ده‌مێ دوَزا گه‌لێ كورد گه‌له‌ك درێژ بوویه و تا نهوَ هه‌موو هیڤی و ئومێدێن خوه بجه نه‌ئیناینه، لێ هێشتا بێ ئومێد نه‌بوویه و به‌رده‌وام خه‌ونا ب وێ روژێ دبینیت كو دناڤ وه‌لاته‌كێ سه‌ربخوه یێ كوردی دا چاره‌نڤیسێ خوه ببینیت، په‌یمانناما سیڤه‌ر گه‌لێ كورد ژ بجهكرنا ڤێ خه‌ونا نه‌ته‌وه‌یی نێزیك كربوو و دناڤا به‌ندێن وێ یێن توماركری دا مافێ قه‌واره و حوكمێ خوه‌بخوه بۆ گه‌لێ كورد سه‌لماند بوو، لێ ئه‌ڤ په‌یماننامه بوویه قوَربانی به‌رژه‌وه‌ندیێن هه‌ڤبه‌ش د ناڤ داگیركه‌رێن كوردستانێ و زلهێزێن جیهانێ دا، ئه‌و بوو ب موركرنا رێككه‌فتنناما لوزانێ داخوازی و مافێن گه‌لێ كورد كرینه قوربانی ڤان به‌رژه‌وه‌ندییان. سه‌ركرده‌یێن خه‌باتا دوهی هه‌موو هه‌ولێن خوه چڕكرن داكو گه‌لێ كورد وه‌كو هه‌موو گه‌لێن ده‌ڤه‌رێ ببیته خودانێ وه‌لاتێ خوه یێ سه‌ربخوه.
بارودوخ هه‌ر ب چ ره‌نگێ بیت و هێزا داگیركه‌ران د هه‌ر ئاسته‌كێ سه‌رسورهێنه‌ر دا كاودان برێڤه ببن، ئه‌وان ژ داخوازیێن گه‌لێن خوه پاشه‌كشه نه‌كریه. گومان د وێ یه‌كێ دا نینه هه‌موو شه‌ر و ڕووبڕووبوونێن گه‌لێ كورد د گه‌ل سوپایێن ئوسمانی و پاشان توركی و ئیراقی و به‌ریتانی دا شه‌رێ نه به‌رانبه‌ر و شوَره‌ش و راپه‌رین د ناڤ بارودوخه‌كێ هه‌ستییار و دژوار دا بوو، لێ هه‌ول و مه‌رجێن داگیركه‌رێن كوردستانێ ئه‌و یه‌ك سه‌پاندیه كو بارودوخه‌ك دروست كریه ژده‌رڤه‌ی داخوازی و ئیراده‌یا گه‌لێ كورد هاتییه خوَلقاتدن، سه‌ركرده‌یێن بزاڤا رزگاریخوازا كوردی ژ داخوازیێن خوه یێن ره‌وا پاشه‌كشه نه‌كریه ژ مافێن سه‌رخوه‌بۆنێ و ئازادیا خاكا وه‌لاتێ خوه.
حه‌ز و ڤییانا سه‌رخوه‌بۆنێ ل ده‌مێ نهوَ ژبلی سه‌روَك بارزانی د ناخێ سه‌ركرده‌یێن نهودا ناهێته دیتن، له‌و ئه‌ز دێ بێژم ده‌نگ ژ ده‌سته‌كی بتنێ ناهێت!! نهوَ ژبۆ په‌رده‌پوَشكرنا ڤێ بێ ئیراده‌یێ، باس ل نه گونجانا بارودوخێ سیاسی و هه‌لومه‌رجێن نێڤده‌وله‌تی و هه‌رێمایه‌تیێ دهێته كرن، ل ده‌مه‌كی بارودوخێ گونجای و دگه‌ل پێشهات و ده‌لیڤه‌یێن روخسای بۆ گه‌لێ كورد ل ده‌مێ دوو ده‌ه سالێن بوری دا چه‌ند جاره‌كا هاتیه پێش، لێ ڵاوازیا ئیراده و نه ئاماده‌یا مێشكێ نه‌ته‌وی ل لایێ هنده‌ك لایه‌نێن سیاسی یێن كوردی د ڤێ قوناغێ دا ئه‌و ده‌رفه‌ت ژ ده‌ستداینه.
سه‌روَك بارزانی پشت ب پێگه‌ه و هێزا خوه‌مالی و ڤیانا نه‌ته‌وه‌یی و مه‌رجێن نێڤده‌وله‌تی و ده‌ڤه‌رێ بستوَیێ خوه ڤه گرتینه، ئه‌وا ل ڤی ده‌می بۆ گه‌لێ كورد و دوَزا وی یا نه‌ته‌وی هاتیه ره‌خساندن ئه‌گه‌ر هه‌موو لایه‌نێن سیاسی یێن هه‌رێما كوردستانێ هاروكارێن سه‌روَك بارزانی ببان، نهوَ ده‌مه‌ك با وه‌لاته‌كێ سه‌ربخوه هاتبا دامه‌زراندن. ئاڤاكرنا وه‌لاته‌كێ سه‌ربخوه بۆ ده‌مه‌كێ درێژ خه‌ونا هه‌موو سه‌ركرده‌یێن كورده ل نهو و ده‌مێ بوریدا، لێ ئه‌ڤ خه‌ونه ل لایێ سه‌روَك بارزانی نه یا مه‌حاله، نهوَ ئه‌وا رێگر ل هه‌مبه‌ر بجهئینانا خه‌ونا وه‌لاته‌كێ كوردی نه‌بوونا ئێكده‌نگی و ئێكرێزیا ناڤمالا كوردی یه، كو ئه‌و ژی ب سه‌ده‌مێ هنده‌ك لایه‌نێن كوردی ئاڤا وان خراب هاتییه رژتن و بووینه دارده‌ست و كرێگرتیێن وه‌لاتێن هه‌ڤ توخویب، سه‌روَك بارزانی هه‌موو ده‌مان ب عه‌قلییه‌تا حزبی سه‌ره‌ده‌ری نه كریه و نونه‌رێ ته‌خه‌یه‌كا حزبی نینه، به‌لكو ب عه‌قلیه‌تا نه‌ته‌وه‌یی نونه‌راتیا سه‌رجه‌م پێكهاته‌یێن كوردستانێ كریه، هه‌موو ده‌مان ل هه‌مبه‌ر روودان و پێشهاته‌یان دا ده‌ستبه‌ردای نه‌بوویه و ب ڕوویه‌كێ نووخواز و مودرێن ل هه‌مبه‌ر كه‌ڤنه په‌رستا راوه‌ستایه، ئه‌وا نهوَ د گوره‌پانێدا هه‌ی جهێ ئومێد و هه‌ول و سیاسه‌تا حه‌كیمانه یا بارزانی یه، هیڤیه ئه‌م هه‌موو هاروكار و پشته‌ڤان بین.
