خه‌ونا وێ ئه‌وه پشكداریێ د پێشانگه‌هێن جیهانی دا بكه‌ت
هه‌له‌بجه، عه‌زیز هه‌ورامی:
به‌هره‌مه‌ندا گه‌نج (عه‌یشێ خه‌مۆ) د دیداره‌كێ دا بۆ رۆژناما ئه‌ڤرۆ دیاركر كو نێزیكی چار سالانه وێ ده‌ست ب چێكرنا كه‌ڤالان كری و ل رۆژێن بۆری بۆ جارا ئێكێ پشكداری د پێشانگه‌هه‌كا هه‌ڤپشك دا كر كو ل پارێزگه‌ها هه‌له‌بجه هاتبوو ڤه‌كرن، و ب گۆتنا وێ هیڤیێن وی گه‌له‌ك مه‌زنتر و خه‌ونا وێ ئه‌وه ل سالێن بهێن كه‌ڤالێن وێ بگه‌هنه ده‌رڤه‌ی وه‌لاتی و پشكداریێ د پێشانگه‌هێن جیهانی دا بكه‌ت.
ناڤهاتیێ گۆت: ئه‌ز ده‌رچۆیا پشكا زانستێن ئه‌لكترۆنی مه، لێ حه‌زا من بۆ هونه‌ری یا ژمێژه، و به‌ری بهێمه دناڤ وارێ هونه‌ری دا من گه‌له‌ك به‌رێ خوه ددا (یۆتیۆپی) كا چاوا كه‌ڤالان چێدكه‌ن و ب راستی ژی من گه‌له‌ك مفا ژێ دیت، وه‌كو من گۆتێ ئه‌ڤه چه‌ند ساله‌كێن كێمن من ده‌ستپێكری، له‌ورا كه‌ڤالێن من ژی دكێمن و ئه‌ز حه‌زناكه‌م گه‌له‌ك كه‌ڤالان چێكه‌م، چنكو چێكرنا كه‌ڤالان نه ب هژمارێ یه به‌لكو ب ناڤه‌رۆكێ یه و ناڤه‌رۆكا پتریا كه‌ڤالێن من ژی ل دۆر رۆلێ ژنێ نه دناڤ جڤاكی دا كو هه‌رده‌م ئه‌ز ل گه‌ل هندێ مه ژن پشته‌ڤانیا ژنان بكه‌ن و پشكه‌كا دی ژی یا كه‌ڤالێن من ل دۆر كچی و ژنێن ئێزدی نه ئه‌وێن كه‌فتینه ده‌ستێن داعش، هه‌روه‌سا ئه‌وێن ژ ده‌ستێن وان رزگاربووین.
